Наманганлик Алихон ота 86 ёшида ҳуқуқий ҳужжатга эга бўлди. Бу ҳақда Наманган вилояти адлия бошқармаси хабар берди. 

Тўрақўрғон туманида инсон ҳуқуқларини таъминлашга қаратилган яна бир масала ижобий ҳал этилди. 1937 йилда туғилган фуқаро Алихон ота Зариповнинг туғилганлик далолатнома ёзуви мавжуд эмаслиги сабабли у узоқ йиллар давомида тегишли ҳужжатсиз яшаб келган. 

Мазкур ҳолат фуқарога бир қатор ижтимоий ва ҳуқуқий хизматлардан тўлиқ фойдаланишда қийинчиликлар туғдириб келган. Муаммо тегишли тартибда ўрганилиб, Фуқаролик ишлари бўйича Чуст туманлараро судига мурожаат қилинди. 

Суд томонидан иш атрофлича кўриб чиқилиб, фуқаронинг туғилганлик ҳолатини тасдиқловчи далиллар асосида туғилганлик қайта тиклаш тўғрисида қарор қабул қилинди. 

Мазкур қарорга асосан Алихон ота Зариповнинг туғилиши белгиланган тартибда қайта тикланиб, унга туғилганлик ҳақида гувоҳнома расмийлаштириб берилди. 

Ушбу амалий ёрдам натижасида фуқаронинг ҳуқуқий мақоми тикланиб, эндиликда у давлат хизматларидан тўлақонли фойдаланиш имкониятига эга бўлди.