Футболда ғалабалар ҳам, аламли мағлубиятлар ҳам бўлади. Аммо айрим натижалар борки, улар ўйин билан эмас, йиллар давомида бажарилган меҳнат билан баҳоланади.

Ўзбекистон терма жамоаси илк бор Жаҳон чемпионати йўлланмасини қўлга киритди ва Марказий Осиё тарихида бу маррага эришган биринчи давлат бўлди. Бу тасодиф эмас, балки йиллар давомида шаклланган футбол тизими, ёшлар академиялари, мураббийлар ва футболчиларнинг машаққатли меҳнати самарасидир.

Жаҳон чемпионати эса якун эмас. Бу — дунёнинг энг кучли жамоалари билан ўйнаб, келажакдаги ғалабалар учун тажриба тўпланадиган майдон. Бугун Португалия, Колумбия ёки Конго каби рақибларга қарши ўйнаган футболчилар эртага янада кучлироқ бўлиб майдонга қайтади.Дунёнинг кўплаб кучли терма жамоалари ҳам илк мундиални осон бошламаган. Аммо айнан ўша тажриба уларни кейинчалик футбол гигантларига айлантирган.

Бу ҳали бошланиши. Ўзбекистон футболининг энг ёрқин саҳифалари ҳали олдинда.