Кабо-Верде терма жамоаси дарвозабони Возиня (ҳақиқий исми — Жозимар Диаш) Чилининг «Коло-Коло» клуби футболчисига айланди.

Томонлар ўртасидаги шартнома муддати ошкор этилмаган. Transfermarkt порталига кўра, 40 ёшли дарвозабон билан тузилган битим 2026 йил 31 декабрга қадар амал қилади. Футболчи тиббий кўрикдан муваффақиятли ўтган.

Маълум қилинишича, Возинянинг маоши ойига 47 миллион Чили песосини ташкил этади. Бу тахминан 49,8 минг АҚШ долларига тенг. Бу унинг аввалги маошидан қарийб беш баравар кўпроқ.

Возиня 2026 йилги жаҳон чемпионатининг энг ёрқин кашфиётларидан бирига айланди. Дарвозабон мухлислар талқинига кўра турнирнинг рамзий терма жамоасига ҳам киритилди.

Айниқса, гуруҳ босқичининг илк турида Испанияга қарши учрашувда дарвозаси дахлсизлигини сақлаб қолгач, унинг ижтимоий тармоқлардаги обуначилари сони бир неча миллионга ошди. Турнир олдидан 50 минг кузатувчига эга бўлган дарвозабоннинг саҳифаси ҳозирда 29,5 миллион обуначига эга. Шу тариқа у ижтимоий тармоқлардаги энг машҳур дарвозабонлардан бирига айланди.

Возиня сўнгги икки мавсумни Португалия иккинчи дивизионидаги «Шавеш» клубида ўтказган. Фаолияти давомида Португалиянинг «Жил Висенте», Молдованинг «Зимбру», Кипрнинг AEL ҳамда Словакиянинг «Тренчин» клубларида ҳам тўп сурган.

«Коло-Коло» Чилининг энг совриндор клуби ҳисобланади. Жамоа 33 марта мамлакат чемпионлиги, 13 марта Чили кубоги ва уч марта Суперкубокни қўлга киритган.

Жаҳон чемпионатида онаси учун кўз ёш тўккан Возиня

2026 йилги футбол бўйича жаҳон чемпионатида Возиня мусобақага онасини олиб кела олмаганди. Бунга виза харажатларининг қимматлиги сабаб бўлган.

Испанияга қарши учрашувдан кейин дарвозабон бу ҳақда интервюсида кўз ёшлар билан сўзлаб берган. Унинг ҳикояси кенг жамоатчилик эътиборини тортди.

Шундан сўнг АҚШ Давлат департаменти виза расмийлаштиришда ёрдам берди ва футболчининг онаси Майами шаҳрига келтирилиб, ўғлининг ўйинини стадиондан томоша қилиш имконига эга бўлди.