Адлия вазирлиги ишлаб чиққан Ҳукумат қарори лойиҳаси билан «Интеллектуал мулк соҳасини ривожлантиришга қўшган ҳиссаси учун» кўкрак нишони тўғрисидаги низом тасдиқланади.

Ҳужжат лойиҳасига кўра, кўкрак нишони билан мамлакатда интеллектуал мулк соҳасини ривожлантиришга, интеллектуал мулк объектларининг ҳуқуқий ҳимоясини таъминлашга ва аҳолида интеллектуал фаолият натижаларига ҳурмат ҳиссини шакллантиришга муносиб ҳисса қўшган фуқаролар тақдирланади.

Кўкрак нишони билан чет эл фуқаролари ва фуқаролиги бўлмаган шахслар ҳам тақдирланиши мумкин.

Кўкрак нишони билан тақдирлашга оид таклифлар ташкилий-ҳуқуқий шаклидан қатъий назар, давлат ва нодавлат нотижорат ташкилотлари, тадбиркорлик субъектлари томонидан ҳар йили 1 январдан 1 мартга қадар Адлия вазирлигига тақдим этилиши лозим.

Қайд этилишича, ушбу кўкрак нишонини таъсис этиш билан рағбатлантирилган соҳа вакиллари кўмагида интеллектуал мулк соҳасидаги давлат сиёсатининг мақсад ва вазифаларига эришилади.