Замонавий ахборот макони шундай шиддат билан ўзгармоқдаки, бугун оддий хабарчи бўлиш кифоя қилмайди. Бугунги ўқувчи тезкорлик билан бирга юксак сифат, холислик ва энг муҳими ҳақиқатни талаб қилмоқда. Айни шу талабларга жавоб бера оладиган замонавий кадрларни шакллантириш мақсадида ОАВ учун Контент тайёрлаш маркази томонидан Тошкент шаҳри ва Тошкент вилоятида йирик медиа лойиҳа доирасида тренинг ва семинарлар бўлиб ўтмоқда.

Ушбу ҳафталик мамлакатимиз медиа маконида фаолият юритаётган журналистлар, блогерлар, матбуот котиблари ҳамда рақамли контент ижодкорларини бир майдонга жамлади.

Муҳокамалар шу қадар қизғин тус олдики, иштирокчилар анъанавий қарашлардан воз кечиб, рақамли дунёнинг янги қоидаларини таҳлил қилдилар.

Сунъий интеллект матн ёзиши, расм чизиши ёки видео монтаж қилиши мумкин, аммо у ҳеч қачон воқеа жойидаги жонли ҳис-туйғуни ва журналистнинг интуициясини алмаштира олмайди.

Оммавий ахборот воситалари ва ижтимоий тармоқларда ёлғон (фейк) маълумотлар кўпайган бир даврда, фактчекинг — ахборот хавфсизлигининг энг олий мезонига айланди.

Лойиҳанинг бош мезони — қуруқ маърузалардан қочиб, бор эътиборни амалий кўникмаларга қаратишдир. Иштирокчилар замонавий медиа трендлар, стратегик коммуникациялар ва аудиторияни жалб қилишнинг замонавий усуллари бўйича тренингларда бевосита қатнашмоқдалар.

Бугунги матбуот котиби ёки блогер нафақат матн ёзишни, балки ахборот инқирозлари даврида стратегик тўғри қарор қабул қилишни, контентни вирал даражада трендга чиқаришни ҳам билиши шарт. Ушбу ҳафталик соҳа вакилларининг профессионал ривожланиши учун мустаҳкам пойдевор бўлиб хизмат қилади.

Айни кунларда пойтахтимизда бўлиб ўтаётган  ушбу медиа ҳафталик янги ғоялар, эксклюзив лойиҳалар ва кучли ҳамкорликлар учун катта старт берди. Иштирокчилар ахборот хавфсизлигини таъминлаган ҳолда, сифатли ва ишончли контент яратишнинг энг сирли жиҳатларини ўзлаштиришда давом этмоқдалар.