Ўзбекистон Республикаси Президенти Шавкат Мирзиёев Беларус Республикаси Президенти Александр Лукашенко билан тор доирада ва расмий делегациялар иштирокида музокаралар ўтказди.

Учрашувда сўнгги йилларда Ўзбекистон ва Беларус ўртасидаги кўп қиррали муносабатлар сифат жиҳатидан янги босқичга кўтарилгани қайд этилди. Томонлар савдо-иқтисодий, саноат, инвестиция, маданий-гуманитар ва ҳудудлараро ҳамкорликни янада кенгайтириш масалаларини муҳокама қилди.

Музокараларда ўзаро савдо ҳажми сўнгги беш йилда қарийб уч баробар ошиб, ўтган йил якунларига кўра қарийб 1 миллиард долларга етгани, жорий йилда эса яна 30 фоизга ўсгани таъкидланди. Шунингдек, икки мамлакат ўртасида 360 та қўшма корхона фаолият юритаётгани қайд этилди.

Етакчилар ўзаро савдо айланмасини 2 миллиард долларга етказиш бўйича келишувлар амалга оширилаётганини, қишлоқ хўжалиги, машинасозлик, фармацевтика, электротехника, енгил саноат, мебелсозлик ва бошқа тармоқларда янги кооперация лойиҳалари ишлаб чиқилганини олқишладилар.

Томонлар тинч атом энергетикаси соҳасида тажриба алмашиш, шунингдек, БМТ, МДҲ, ШҲТ ва Қўшилмаслик ҳаракати каби халқаро тузилмалар доирасида ҳамкорликни давом эттиришга тайёр эканини тасдиқлади.

Шунингдек, жорий йил охирига қадар қўшма туризм, тиббиёт ва таълим форумларини ўтказишга келишиб олинди.

Музокаралар якунида Президент Шавкат Мирзиёев Беларус Президенти Александр Лукашенкони расмий ташриф билан Ўзбекистонга келишга таклиф қилди.