Sportico журнали дунёнинг энг қиммат 50 футбол клубидан иборат анъанавий йиллик рейтингини эълон қилди. Гарчи яшил майдонларда анчадан буён порламай қўйган бўлса-да, жаҳондаги энг қиммат футбол жамоаси мақомини «Манчестер Юнайтед» сақлаб қолди.

«Қизил иблислар» $6,2 млрдга баҳоланди (ўтган йили $5,95 млрд эди). Ўтган йили британ миллиардери Жим Рэтклифф «МЮ» акцияларининг 28 фоизини $1,6 миллиардга сотиб олганди.

Дунёнинг энг қиммат футбол жамоалари (топ-10):

1. «Манчестер Юнайтед» (Англия) — $6,2 млрд;
2. «Реал» (Испания) — $6,06 млрд;
3. «Барселона» (Испания) — $5,28 млрд;
4. «Ливерпул» (Англия) — $5,11 млрд;
5. «Бавария» (Германия) — $4,8 млрд;
6. «Манчестер Сити» (Англия) — $4,75 млрд;
7. «Пари Сен-Жермен» (Франция) — $4,05 млрд;
8. «Арсенал» (Англия) — $3,91 млрд;
9. «Тоттенҳэм» (Англия) — $3,49 млрд;
10. «Челси» (Англия) — $3,47 млрд.

Энг қиммат ўнликдагиларнинг барчаси — Европа жамоалари, бироқ топ-50 да ҳаммадан кўп Шимолий Американинг Бош футбол лигаси (MLS) клублари — 20 та. MLS даги энг қиммат жамоа — «Лос-Анжелес» ($1,15 млрд, 15-ўрин), рейтингдаги 20 та MLS жамоасининг умумий қиймати — $15,1 млрд.

Топ-50 да Англия премьер-лигасидан 9 жамоа бор, жами қиймати — $29 млрд.

Рейтингда Италиядан — 6, Германиядан — 4, Испаниядан — 3, Мексикадан — 3, Франциядан — 2, Нидерландия, Португалия ва Бразилиядан биттадан жамоа бор.