Беларуснинг FA Playsport агентлиги раҳбари Владимир Осипов Eurasia Football’га берган интервьюсида Марказий Осиё футболчилари трансферлари ҳақида фикр билдирди ва минтақадаги чемпионатлар даражасини таққослади.

Осиповга кўра, Ўзбекистон Суперлигаси Марказий Осиёдаги энг кучли чемпионат ҳисобланади. Унинг таъкидлашича, ўзбекистонлик футболчилар қирғиз ўйинчилари каби техник жиҳатдан яхши тайёрланган, бироқ жисмонан кучлироқ ва барқарорроқ.

Шу билан бирга, у Ўзбекистонда ёшлар тайёргарлиги тизими яхши йўлга қўйилганини қайд этди. Унинг фикрича, ҳозир Қирғизистон Премьер-лигаси ҳам айнан Ўзбекистон модели асосида ривожланишга ҳаракат қилмоқда.

Осиповнинг фикрича, Марказий Осиёнинг футболчилар етказиб бериш борасида истиқболи бор. Айниқса ўзбекистонлик футболчилар учун. Уларнинг тайёргарлиги юқори ва жисмоний салоҳияти кучли. Бироқ мослашиш масаласи долзарб: кўпчилиги жуда камтар, жамоага тез сингиб кетишда қийналиши мумкин.

Шу билан бирга, паспорт ва виза масаласи ҳам муҳим омил сифатида қайд этилди. Масалан, серб футболчилари Европа ҳудудига яқинлиги ва айрим енгилликлар сабабли ҳужжат жиҳатидан камроқ тўсиққа учрайди. Қирғиз, ўзбек ёки беларус футболчилари эса кўпроқ расмий жараёнлардан ўтишига тўғри келади.

Осиповнинг таъкидлашича, агар Ўзбекистон сиёсий-дипломатик даражада виза режимини енгиллаштира олса, ўзбек футболчилари Европа бозорида экспорт марказига айланиши мумкин.