O‘zbekiston TIV matbuot kotibi sahifasida Qirg‘iz Respublikasining «Kabar» milliy axborot agentligining O‘zbekistondagi ko‘p yillik muxbiri, tajribali jurnalist To‘lanboy Qurbonov vafoti munosabati bilan hamdardlik bildirildi.

To‘lanboy Qurbonov 1952-yilda Andijon viloyatida tug‘ilgan. U faoliyati davomida O‘zbekiston va Qirg‘iziston o‘rtasidagi do‘stona munosabatlarni yoritishga munosib hissa qo‘shgan. Uzoq yillar respublika radiosining qirg‘iz bo‘limida faoliyat olib borgan.

U 2003-yildan buyon O‘zbekiston Respublikasi Tashqi ishlar vazirligi huzurida doimiy akkreditatsiyadan o‘tgan xorijiy jurnalist sifatida mamlakatdagi muhim ijtimoiy-siyosiy jarayonlarni xolis va tezkor yoritib kelgan.

Shuningdek, To‘lanboy Qurbonov qirg‘iz va o‘zbek xalqlari o‘rtasidagi madaniy yaqinlikni mustahkamlashga qaratilgan tarjima ishlarida ham faol ishtirok etgan. Jumladan, u qirg‘iz xalqining buyuk adibi Chingiz Aytmatov asarlarini tarjima qilish orqali ma’naviy meros targ‘ibotiga hissa qo‘shgan.

«Xabar.uz» marhumning oila a’zolari va yaqinlariga chuqur hamdardlik izhor etadi.