O‘zbekiston Respublikasi Milliy gvardiyasining barcha harbiy qismlarida bo‘lgani kabi, ikki oy avval Qoraqalpog‘iston Respublikasi Nukus shahrida joylashgan harbiy qismga ham o‘z bilim va salohiyatiga ega bo‘lgan yosh yigitlar muddatli harbiy xizmatni o‘tashga qabul qilingan edi.

Kuni-kecha yosh askarlar o‘z bilimlarini sinab ko‘rdilar, aniqrog‘i, ularga harbiy texnika, qurol-aslahalar borasida egallagan va to‘plagan ma’lumot hamda bilimlarini amalda qo‘llashlariga sharoit yaratib berildi. Bu haqda Milliy gvardiyasi matbuot xizmati xabar berib o‘tdi.

Dala o‘quv maydonida yosh askarlar uchun tashkil etilgan dastlabki o‘quv taktik mashg‘ulotlari o‘tkazildi. Mashg‘ulot mobaynida 12 ta o‘quv nuqtasi tayyorlanib, ushbu o‘quv nuqtalarida qurolni to‘g‘ri otish holatiga keltirish, qurolni qismlarga ajratish va qayta yig‘ish, granata uloqtirish, tungi optik moslamalarni ishga tayyorlash kabi mashqlarni yangi innovatsion yondashuvlar asosida o‘rgatish rejaga asosan amalga oshirildi. Dala mashg‘ulotlari yakunida muddatli harbiy xizmatchilar o‘q otish mashqlarini bajardilar. Deyarli barcha askarlar harbiy texnika va qurol-aslahalar bo‘yicha berilayotgan bilimlarni yaxshi va a’lo baholarga o‘zlashtirganliklarini namoyon eta oldilar.