McAfee kompaniyasi asoschisi Jon Makafining jasadi hamon Ispaniya o‘likxonasida saqlanmoqda, bu haqda bugun, 23-iyun kuni El Diario gazetasi yozdi.

«Bir yil avval vafot etgan Makafining jasadi hamon Barselondagi o‘likxonalardan birida qolmoqda...», — deb yozdi nashr. Gazeta qayd etishicha, jasad AQShga repatriatsiya qilinishi sanasi noma’lum: «Bir qarorga kelish uchun yana oylab vaqt ketishi mumkin».

Eslatib o‘tamiz, 2021-yilning 23-iyunida Ispaniyadagi qamoqxona kamerasida 75 yoshli Makafining jasadi topilgandi. O‘sha kuni Ispaniya milliy sudi soliqlarni to‘lamaganlikda ayblangan Makafini AQShga ekstraditsiya qilish qarorini chiqargandi.

Mavzu doirasida: «McAfee» antivirusini yaratgan Jon Makafi qamoqda o‘lik holda topildi

Bundan avvalroq o‘z bayonotida Makafi hech qachon joniga qasd qilmasligini, agar shunday deyishsa, bu «WHACKD», ya’ni uning o‘ldirilganini anglatishini aytgandi.

McAfee — antiviruslar chiqaruvchi mashhur kompaniya. Undan AQSh davlat idoralari ham ko‘p foydalanadi. Makafi bir gapida o‘ziga ma’lum xususiyatlardan foydalanib, antivirus vositasida AQSh vazirliklari sirlaridan boxabar bo‘la olishi bilan maqtangandi.