Yevropa parlamenti Ukrainaga 90 mlrd yevro kreditni ma’qulladi
Yevropa Parlamenti 2026–2027-yillarda Ukrainaga 90 milliard yevro miqdorida kredit ajratishni ma’qulladi.
AFP xabar berishicha, 458 nafar Yevropa Parlamenti a’zosi yoqlab, 140 nafari qarshi ovoz berdi. Yevropa Parlamentidagi ovoz berish kreditni tasdiqlashning so‘nggi bosqichi bo‘ldi.
Yevropa Ittifoqi rahbarlari 2025-yil dekabr oyida Ukrainaga foizsiz kredit berishga kelishib oldilar. Kredit Yevropa Ittifoqining kapital bozorlaridan qarz olish hisobiga moliyalashtiriladi va dastlab taklif qilinganidek, Rossiya aktivlaridan foydalanmasdan, Yevropa Ittifoqi budjeti bilan ta’minlanadi.
Kreditni qaytarish Rossiya Ukrainaga reparatsiya to‘lovlarini amalga oshirgandan so‘ng amalga oshirilishi kutilmoqda. Ajratilgan mablag‘lar ikki qismga bo‘linadi: 60 milliard yevro harbiy xaridlar uchun, 30 milliard yevro esa mamlakat budjetini qo‘llab-quvvatlaydi. Birinchi to‘lov Kiyev uchun 2026-yilning ikkinchi choragi boshida rejalashtirilgan.
Izoh qoldirish uchun saytda ro'yxatdan o'ting
Kirish
Ijtimoiy tarmoqlar orqali kiring
FacebookTwitter