Гамбиядан қайиқда Канар оролларига етиб боришга уринган 80 га яқин ноқонуний муҳожир ҳалок бўлди. Бу ҳақда Sky News пайшанба куни Испания денгиз қутқарув хизматига таяниб хабар берди.

​«Биз қайиқда саёҳат қилган 128 иммигрантдан 80 га яқини ҳалок бўлганини аниқладик», деб хабар берди канал Испания давлат хизматидан иқтибос келтирган ҳолда.

Аввалроқ Испания денгиз қутқарув хизмати ўз самолётларидан бири ўтган куни Гран Канариядан тахминан 120 километр жанубда сузиб кетаётган кемани кўрганини хабар қилган эди. Sky News хабарига кўра, кемада Саҳрои Кабирдан жанубий Африкадан келган бир гуруҳ ноқонуний муҳожирлар бўлган.

​Associated Press агентлигининг хабар беришича, испан денгизчилари 44 кишини қутқаришга муваффақ бўлишган.

Агентликнинг таъкидлашича, сўнгги йилларда ўн минглаб ноқонуний муҳожирлар Канар оролларига етиб боришга уриниш пайтида ҳалок бўлган ёки бедарак йўқолган. Баъзи қайиқлар йўналишдан адашиб, Атлантика океани орқали Шимолий ва Жанубий Америка қирғоқларигача сузиб кетган.