АҚШ собиқ давлат котиби Энтони Блинкен Вашингтон томонидан Украинага катта миқдорда кўмак ажратилгани, Европа эса етарлича ёрдам бермагани ҳақидаги даъволарга ойдинлик киритди.

«Биз Украинага бир доллар кўмак берган бўлсак, европаликлар унга бир ярим доллар қўшиб тақдим этишди. Бинобарин, европаликлар вазиятдан фойдаланиб қолди деган фикр ҳақиқатни тўғри келмайди», – деди собиқ давлат котиби С-Span эфирида.

Блинкенга кўра, Америка томонидан Украинага кўмак сифатида ажратилган маблағларнинг катта қисми Қўшма Штатларнинг ўзида қолган. Яъни ушбу маблағлар АҚШ ҳарбий саноатини, умуман, иқтисодиётини янада ривожлантиришга хизмат қилган.

Блинкен Вашингтон нега Кремль тажовузига учраган Киевга кўмак беришга қарор қилганини ҳам изоҳлаган.

Сиёсатчига кўра, Россия миллий суверенитет ва ҳудудий яхлитлик каби халқаро меъёрларни очиқ равишда бузгани боис Вашингтон жабрдийда томоннинг ёнини олган.

«Агар сиз бундай ҳолатни эътиборсиз қолдирсангиз, Россия хоҳлаган ишини қилишига изн берсангиз, оқибатда фитна қутиси очилади», – деган у.

Блинкен Украина сўнгги вақтларда Россия билан урушда ташаббусни қўлга олган деган фикрда.

«Охирги ойларда украинлар яхши натижаларга эришди, россияликлар эса даҳшатли йўқотишларга учради ва амалда айрим позицияларни бой берди», – деган у.

Жо Байден маъмуриятида, 2021-2025 йилларда АҚШ давлат котиби лавозимида фаолият юритган Блинкеннинг баёнотини амалдаги президент Доналд Трампнинг Украинага қарши айбловларига жавоб дейиш мумкин.

Гап шундаки, Трамп Байден маъмурияти даврида Киевга бебилиска пул ва қурол-яроғ берилгани, жумладан, 350 миллиард доллар тортиқ қилинганини даъво қилиб келади.

Украина президенти Владимир Зеленский Трампнинг даъвосини рад этиб, Қўшма Штатлар кўрсатган жами кўмак 100 миллиард долларга яқин экани маълум қилган.

Зеленскийнинг Вашингтонда Трамп билан 2025 йил 28 феврал кунги учрашуви мисли кўрилмаган дипломатик можарога айланиб кетган эди. Ўшанда ҳам тортишув АҚШ вице-президенти Жей Ди Вэнс Зеленскийни Трампга ҳурматсизлик қилгани ва миннатдорлик билдирмаганликда айблаганидан кейин бошланганди.

Дарвоқе, Жей Ди Вэнс бир ойча аввал Украинага тўғридан-тўғри қурол етказиб беришни тўхтатиш қарорини Трамп маъмуриятининг асосий ютуқларидан бири деб баҳолади. Унинг таъкидлашича, Вашингтон энди Украина учун қурол сотиб олмайди ва уни юбормайди. Европа давлатлари эса агар хоҳласа, Киевни мустақил равишда қўллаб-қувватлаши мумкин.