АҚШ Хитойнинг яримўтказгич саноати ва сунъий интеллект ишланмаларига қарши санкцияларни кучайтирди. Бу ҳақда Financial Times хабар бермоқда.

АҚШ маъмурияти яримўтказгич компонентларини ишлаб чиқариш учун 24 турдаги ускуналарга янги экспорт назоратини жорий қилди. Улар Хитойга чип ишлаб чиқариш учун ишлатиладиган юқори ўтказувчанлик хотира чипларини етказиб беришга таъсир қилади. Бундан ташқари, CMIC ва Huawei каби Хитойнинг 140 компанияси глобал ишлаб чиқарувчиларга етказиб бериш учун экспорт лицензиясини талаб қилувчи ташкилотлар рўйхатига қўшилади.

«Булар Хитойнинг мудофаа секторини модернизация қилишда Пекин фойдаланадиган энг илғор чипларни ишлаб чиқариш қобилиятини пасайтириш учун Қўшма Штатлар жорий қилган энг қаттиқ назоратдир», деб тушунтирди АҚШ Савдо вазири Жина Раймондо.

Июл ойида АҚШ президенти Жо Байден маъмурияти яримўтказгич ишлаб чиқариш ускуналарини Хитой чип ишлаб чиқарувчиларига экспорт қилишни кучайтириш режалари ҳақида маълум бўлганди. Эълон қилинган чора-тадбирлар Хитойнинг ярим ўнга яқин заводларининг 30 дан ортиқ мамлакатлардан, жумладан Исроил, Сингапур ва Малайзиядан ускуналар ва технология олиш имкониятини чеклайди.

Ноябр ойи бошида АҚШ ҳукумати Тайваннинг яримўтказгичлар ишлаб чиқарувчи Taiwan Semiconductor Manufacturing Company компаниясидан Хитойга сунъий интеллект соҳасида қўлланиладиган чипларни етказиб беришни тўхтатишни талаб қилгани айтилганди.