Аргентина гўштга боқилган қорамоллар экспорти бўйича 50 йилдан узоқроқ давом этган чекловни бекор қилди. Бу ҳақда Nieuwe Oogst портали хабар берди.

Мамлакат президенти Хавйер Милейнинг фикрича, ушбу чора катта рақобат, катта эркин бозор ва кўпроқ хорижий валюта кириб келишига йўл очади.

Экспертларнинг кузатувларига кўра, Туркия, Ироқ, Ливан, Иордания, Миср, Перу ва Колумбия каби мамлакатларда Аргентинанинг йирик шохли қорамолларига талаб юқори.

Мамлакатда гўштга боқилган қорамоллар экспорти 1973 йилда тақиқланган эди. Ўз навбатида, совитилган ва музлатилган мол гўшти экспортида Аргентина жаҳонда етакчилардан ҳисобланади.

Аргентина мол гўшти экспортини ўтган йили 10 фоизга ошириб 935 261 тоннага етказди ва 1924 йил рекордини янгилади. Мамлакатнинг асосий мижозлари — АҚШ, Хитой, Мексика, Канада ва Малайзия.

Таъкидлаш керакки, унинг қўшниси — Бразилия йирик қорамоллар экспортини 2010 йилдан буён амалга оширмоқда ва ҳозирга қадар 2,6 млн бош атрофида қорамолни четга сотди.

Ҳайвонлар ҳуқуқларини ҳимоя қилувчи ташкилотлар бу йўналишдаги экспортни тақиқлашни талаб қилишмоқда, чунки узоқ йўлда ҳайвонлар азоб чекади. Ҳайвонларни ташиш шароитлари узоқ ўрганилганидан сўнг, Янги Зеландия 2023 йилда тирик моллар экспортини ман этганди.