Жефф Безос томонидан асос солинган Blue Origin компаниясининг New Glenn оғир ракетаси Флоридадаги Кеннеди номидаги фазовий марказнинг учиш майдончасида парвоз олди синовлари вақтида портлаб кетди.

Ҳодиса учишдан олдинги якуний текширув пайтида юз берган. Ракетанинг пастки қисмида ёнғин чиққан, шундан сўнг ёнилғининг кучли алангаланиши содир бўлган ва ташувчи ракета бутунлай вайрон бўлган.

New Glenn Blue Origin компаниясининг асосий лойиҳасига айланиши керак эди — у SpaceX ишланмалари билан рақобатлаша оладиган, қисман кўп марталик оғир ракета ҳисобланади. Ундан Amazon сунъий йўлдошларини орбитага чиқаришда ва NASAнинг Ой дастурида фойдаланиш режалаштирилган эди

«Барча ходимлар топилди ва улар хавфсизликда. Ҳозирча авариянинг асосий сабабини айтишга эрта, биз буни аниқлаштирамиз. Жуда оғир кун бўлди, лекин биз тикланиши керак бўлган ҳамма нарсани тиклаймиз ва парвозларга қайтамиз. У шунга арзийди», — деб ёзди Безос.

NASA раҳбари Жаред Айзекман воқеага қуйидагича муносабат билдирди: «Космос хатоларни кечирмайди, янги оғир ташувчи ракеталарни ишлаб чиқиш эса ҳаддан ташқари мураккабдир».

Илон Маск ҳам «ракеталар соҳаси ўта оғирлигини» таъкидлаб, Безоснинг компанияси юз берган ҳодисадан кейин «тез орада ўзини тиклаб олишига» умид билдирди.

Кўнгилсиз ҳодиса New Glenn дастурини секинлаштириши ҳамда Amazon сунъий йўлдош лойиҳалари ва Artemis Ой дастурини амалга ошириш муддатларига таъсир қилиши мумкин.