Телеграмга бўлган ҳар қандай босим ўтказиш уринишини ошкор қилишда давом этаман – Дуров.

Telegram ижтимоий тармоғи асосчиси Павел Дуров бир йил олдин Франция махсус хизматлари воситачи орқали ундан Молдова ҳукуматига ушбу мамлакатда президентлик сайловлари олдидан мессенжердаги айрим каналларни цензура қилишда кўмаклашишни сўраганини маълум қилди.

Шунингдек, хабарда Telegram Франция ва Молдова расмий идоралари томонидан кўрсатилган каналларни текширгандан сўнг, уларнинг бир нечтаси ҳақиқатан ҳам платформанинг ички қоидаларини бузгани аниқланган ва ўчириб ташлангани айтилади.

"Кейин воситачи менга ушбу ҳамкорлик эвазига француз разведкаси гўёки ўтган йилнинг август ойида мени қамоққа олиш учун ордер берган судьяга мен ҳақимда “ижобий фикр билдириши”ни айтди”, – деб маълум қилди у.

Дуров бундай таклифни мутлақо номақбул деб ҳисоблаганини таъкидлаган. Унинг сўзларига кўра, агар разведка ҳақиқатан ҳам судьяга таъсир ўтказишга уринган бўлса, буни суд жараёнига аралашиш деб баҳолаш мумкин.