Эрон АҚШ билан имкон қадар тезроқ келишувга эришиш учун барча зарур чораларни кўришга тайёрлигини билдирди. Мамлакат Женева музокараларига яхши ният билан ёндашмоқда, деди ташқи ишлар вазири ўринбосари Мажид Тахт-Раванчи. 

«Биз имкон қадар тезроқ келишувга эришишга тайёрмиз. Бунинг амалга ошиши учун барча зарур ишларни қилишни хоҳлаймиз», деди Тахт-Раванчи Миллий жамоат радиосида. 

Вазир ўринбосарининг сўзларига кўра, агар барча томонларда сиёсий ирода бўлса, келишув тезда тузилиши мумкин.«Умид қиламизки, бу яхши ният ва бу ёндашув америкаликлар томонидан ўзаро қўллаб-қувватланади», дея қўшимча қилди у. 

17 феврал куни Ўмон воситачилигида Эрон ва АҚШ ўртасидаги музокараларнинг иккинчи босқичи якунланди. Эрон ташқи ишлар вазири Аббос Арагчи келажакдаги ядровий келишувнинг бир нечта асосий бандлари бўйича келишувга эришганини эълон қилди, Оқ уй эса ҳали ҳам келишмовчиликлар борлигини таъкидлади. АҚШ президенти Доналд Трамп Теҳронга келишувга эришиш учун 10-15 кун вақт берди.

Кейинги маслаҳатлашувлар 26 феврал куни Швейцарияда бўлиб ўтиши режалаштирилган.