Эрон суди генерал Қосим Сулаймонийнинг ўлимига алоқадор деб кўрилган АҚШ ҳукумати ҳамда бошқа шахслар ва ташкилотлардан 49,77 миллиард доллар миқдорида хун пули ундириш ҳақида ҳукм чиқарди. 

IRNA ахборот агентлиги хабарига кўра маҳкама АҚШ ҳукумати ва 41 нафар жисмоний ва юридик шахсларни генерал Сулаймонийнинг ўлимида айбдор деб топган.  

Хун пули тўлаши лозим бўлган шахслар орасида АҚШ собиқ президенти Дональд Трамп, собиқ давлат котиби Майк Помпео ва собиқ мудофаа вазири Марк Эспер бор.

Эрон Ислом Республикасидаги нуфузли генераллардан бири, жанговар “Қудс” бўлинмаси қўмондони Қосим Сулаймоний 2020 йил 3 январь куни Бағдодда АҚШ ҳарбий ҳаво кучлари авиаҳужуми пайти ўлдирилган. У билан бирга эронлик бир неча қудратли ҳарбийлар, жумладан, Абу Маҳди ал-Муҳандис ҳам ҳалок бўлган.

Хорижий мамлкатлар, хусусан, Сурия ҳамда Ироқда ҳарбий операцияларга бошчилик қилиб келган Сулаймонийнинг ўлими Эронда миллий мотам ўлароқ қабул қилинган.

Ўшанда АҚШ президенти Дональд Трамп генерал Сулаймоний эҳтимолий урушни олдини олиш учун ўлдирилганини айтган.

Эрон расмийлари Сулаймонийнинг ўлдирилишини теракт деб атаган ва бунинг учун АҚШдан қасос олишга ваъда берган.

Вашингтон ва Теҳрон ўртасидаги мураккаб дипломатик муносабатлар генералнинг ўлими ортидан янада таранглашган, икки мамлакат ҳатто  уруш ҳолатига келиб қолган.

Эрон ҳуқуқ идоралари кейинроқ АҚШ президенти Трампни ҳибсга олишга ордер берган.

Мамлакат олий суди Қосим Сулаймоний ҳақидаги махфий маълумотларни АҚШ жосуслик хизматига етказган Маҳмуд Мусавий Мажидни ўлимга ҳукм қилган.