Исроил Бош вазири Исроил, Ливан ва АҚШ ўртасида имзоланган уч томонлама келишувни тарихий воқеа деб атади. Қайд этилишича, ҳужжат икки қўшни давлат ўртасида узоқ йиллардан бери давом этаётган можарога барҳам бериш ва келгусида тўлиқ тинчлик шартномасини имзолаш учун ҳуқуқий асос яратишга қаратилган.

Нетаняху телевидение орқали мурожаатида келишув АҚШ воситачилигида тўғридан-тўғри музокаралар натижасида эришилганини таъкидлади.

«Кеча Исроил давлати учун тарихий келишувга эришдик. Бу Эрон ва «Ҳизбуллоҳ» учун жиддий зарба бўлди», – деди у.

Келишув Вашингтонда ўтказилган беш раундлик музокаралардан сўнг имзоланган. Ҳужжатга мувофиқ, Ливан қуролли кучлари ҳозирда Исроил назоратида бўлган айрим ҳудудларда босқичма-босқич ўз қўлига олади ҳамда «Ҳизбуллоҳ»ни қуролсизлантириш жараёнини амалга оширади.

Шунингдек, томонлар қуролли қарама-қаршиликка тўлиқ барҳам бериш, унинг асосий сабабларини йўқотиш ва Исроил ҳамда Ливан ўртасидаги уруш ҳолатига расман чек қўйиш ниятини билдирган.

Ҳужжатда «Ҳизбуллоҳ» қуролсизлантирилгандан кейин Ливан армияси мамлакатнинг бутун ҳудуди устидан суверен назоратни қайта тиклаши назарда тутилган.

Бироқ Нетаняху Исроил армияси жанубий Ливандаги буфер ҳудудни хавфсизлик нуқтаи назаридан зарур деб ҳисобланган муддат давомида сақлаб қолишини маълум қилди.

«Биз бу ҳудудни «Ҳизбуллоҳ» ва бошқа террорчи гуруҳлар қуролсизлантирилмагунча, Ливан ҳудудидан Исроилга таҳдид бутунлай барҳам топмагунча тарк этмаймиз», – деди у.

Ливан президенти Йозеф Аун эса келишувни мамлакат суверенитетини тиклаш йўлидаги «биринчи қадам» деб баҳолади.

Шу билан бирга, келишув ҳар икки томонда ҳам кескин танқидларга учради.

Исроилнинг миллий хавфсизлик вазири Итамар Бен-Гвир Ливан ҳукуматига ишониб бўлмаслигини таъкидлаб, «Ҳизбуллоҳ»ни қуролсизлантириш фақат Исроил мудофаа армияси томонидан амалга оширилиши мумкинлигини билдирди.

«Ливан билан тузилган келишув катта хато. Ливан ҳукуматида «Ҳизбуллоҳ» вакиллари бор экан, уларнинг ушбу ҳаракатни қуролсизлантиришига ишониб бўлмайди», – деб ёзди у ўзининг Telegram-каналида.

Ўз навбатида, «Ҳизбуллоҳ» раҳбари Наим Қосим ҳам келишувни қаттиқ қоралади. У ҳужжатни Ливан ҳукумати томонидан йўл қўйилган «катта хато» ва «таслим бўлиш» деб атади.