Қирғизистон Жогорку Кенеши (парламенти) спикери Нурланбек Тургунбек уулу лавозимидан ихтиёрий равишда кетишини маълум қилди.

Ушбу баёнот 12 февраль куни парламент мажлисида янгради, деб хабар берди 24.kg нашри.

Тургунбек уулу 2022 йилда спикер лавозимига тайинланган.

«Мен ҳеч қачон бир ёки икки шахс манфаати учун ишлаган эмасман, доимо мамлакат ва қирғиз халқи манфаатларини кўзлаганман. Шу вақт давомида мамлакатда муҳим ва зарур қарорлар қабул қилинишига ўз ҳиссамни қўшдим. Мен ҳеч қаерга кетмаяпман, депутат сифатида фаолиятимни давом эттираман. Сиёсий барқарорликни сақлаш учун интригаларсиз ишлашни ўрганишимиз керак», – деди у. 

Унинг қўшимча қилишича, бир кун олдин Туркиядан қайтган ва ташриф жуда самарали ўтган.

Нурланбек Тургунбек уулунинг эҳтимолий истеъфоси ҳақидаги тахминлар 10 февраль куни, собиқ вице-премьер ва Давлат миллий хавфсизлик қўмитаси раиси Камчибек Ташиев лавозимидан озод этилганидан сўнг пайдо бўлган эди. Бироқ парламент матбуот хизмати ўшанда бу маълумотларни рад этган.