Бразилия Олий суди давлат тўнтаришига тайёргарлик кўриш иши бўйича суд қилинаётган собиқ президент Жаир Болсонаруни ижтимоий тармоқлардан фойдаланишга қўйилган тақиқни бузгани учун уй қамоғига олишни буюрди.

Таъкидланишича, Болсонару ўз тарафдорлари, жумладан, депутат-ўғилларининг ижтимоий тармоқлардаги саҳифаларидан фойдаланиб, Олий судга ҳужум қилиш ва Бразилия суд тизимига чет эл аралашувига ундовчи хабарларни тарқатган.

Якшанба куни Бразилиянинг турли шаҳарларида Болсонаруни қўллаб-қувватловчи намойишлар бўлиб ўтди. Унинг ўғилларидан бири Флавио акция пайтида отаси Рио-де-Жанейрода йиғилганларга мурожаат қилиши учун уни қисқа вақтга баланд овозли алоқага улаган. Кейинроқ у отасининг ўз тарафдорларига мурожаати видеосини ҳам эълон қилди. Пост кейинроқ ўчириб ташланган.

Олий суд, шунингдек, Болсонаруга адвокатлар ёки суд томонидан тасдиқланган шахслардан ташқари, бошқа ташриф буюрувчиларни қабул қилишни ҳамда мобил телефондан фойдаланишни тақиқлади.