АҚШнинг «SpaceX» компанияси «Alphabet» таркибидаги «Google» билан кўп йиллик булутли ҳисоблаш хизматлари бўйича шартнома тузганини маълум қилди. Бу ҳақда «Reuters» ахборот агентлиги хабар берди.

Компания тақдим этган ҳужжатларга кўра, келишув доирасида «Google» 2026 йил октябридан 2029 йил июнига қадар ҳар ой 920 миллион доллар тўлаб боради. Сентябр ойигача эса ҳисоблаш қувватлари босқичма-босқич ишга туширилиб, камайтирилган тарифлар қўлланилади.

Битим доирасида «Google» учун тахминан 110 мингта «Nvidia» график процессори, марказий процессорлар, хотира тизимлари ва бошқа ҳисоблаш инфратузилмаси тақдим этилади. Бу эса сунъий интеллект моделларини ўқитиш ва ишлатиш учун катта ресурс ҳисобланади.

Келишув «SpaceX» учун навбатдаги йирик мижозни жалб қилди. Бундан аввал компания сунъий интеллект соҳасидаги етакчи иштирокчилардан бири бўлган «Anthropic» билан ҳам катта ҳажмдаги шартнома имзолаган эди.

Май ойида «Anthropic» «SpaceX»нинг Теннесси штатида жойлашган «Colossus 1» ҳисоблаш марказининг тўлиқ қувватидан фойдаланиш бўйича келишувга эришган. Ушбу марказда 220 мингдан ортиқ «Nvidia» процессорлари жойлашган.

Маълум қилинишича, «Anthropic» ва «Google» билан тузилган ҳисоблаш қуввати бўйича шартномаларнинг йиллик умумий қиймати тахминан 26 миллиард долларга тенг. Бу рақамлар компаниянинг сунъий интеллект инфратузилмаси бозоридаги ўрнини мустаҳкамлаётганини кўрсатади.