Сурия ҳукумати Исроил билан можарони истамайди ва у билан хавфсизлик келишувини изламоқда, деди Сурия президенти Аҳмад аш-Шараа Ал Жазира нашрига.

«Биз Исроил билан тўқнашувга интилмаймиз; бунга қизиқмаймиз. Агар Исроил билан хавфсизлик келишуви муваффақиятли бўлса, Сурия босиб олинган Голан тепаликларига бўлган ҳуқуқларидан воз кечмасдан глобал тинчликка йўл очади», деди аш-Шараа.

Президент келишувга Сурия ва Исроилдан ташқари бутун бир гуруҳ мамлакатлар киришини таклиф қилди ва Дамашқ Ливандаги вазиятга ҳарбий аралашишни истамаслигини қўшимча қилди. «Биз минтақадаги уруш зонасининг кучайишидан хавотирдамиз. Биз Ливанга бирон бир ҳарбий аралашув ниятида эмасмиз», деди у.

Аш-Шараа Дамашқ Ливан ҳукуматининг куч ишлатиш ва ҳарбий ҳаракатлар олиб бориш бўйича қарорлар қабул қилишда якка тартибда ихтиёр қилиш ҳуқуқини қўллаб-қувватлашини таъкидлади. «Ливандаги ҳар қандай тартибсизлик Сурияга бевосита таъсир қилади», деб қўшимча қилди президент.

Апрель ойининг ўрталарида аш-Шараа Туркиядаги Анталия дипломатик форумида Дамашқ Исроил билан хавфсизлик келишувига эришиш ниятида эканлигини, бу келишувга Исроил қўшинларини жанубий Суриядан олиб чиқишни ўз ичига олиши кераклигини айтди. Унинг сўзларига кўра, агар бундай келишувга эришилса, Сурия ҳукумати оккупация қилинган Голан тепаликлари бўйича Исроил билан музокараларни бошлаши мумкин.