Доналд Трамп Эронга қарши ҳарбий ҳаракатлар якунлангани ҳақида Конгрессни хабардор қилди. Аммо бу уруш тугади дегани эмас, аксинча, куч ишлатиш учун Конгресс рухсатини олиш талабини четлаб ўтиш учун қилинган ўзига хос юриш.

«2026 йил 28 февралда бошланган ҳарбий ҳаракатлар тўхтатилди», — деб маълум қилди АҚШ президенти Сенат ва Вакиллар палатасига йўллаган мактубида.

Шу билан бирга, Трампнинг сўзларига кўра, «АҚШнинг Эрон режимига қарши амалиётлари муваффақиятли ўтганига ва мустаҳкам тинчликни таъминлаш борасидаги давом этаётган саъй-ҳаракатларга қарамай, Эрон томонидан Қўшма Штатлар ва унинг қуролли кучларига таҳдид ҳамон сезиларли бўлиб қолмоқда». Шу сабабли Пентагон минтақада Қуролли кучлар иштирокини қўллаб-қувватлашда давом этади ҳамда «зарурат туғилганда ва мақсадга мувофиқ бўлганда» Эрон ва унга воситачи кучлар томонидан бўлаётган таҳдидларга жавоб қайтаради.

Трамп ўз мактубида таъкидлашича, 7 апрелдан бери АҚШ ва Эрон бир-бирига зарбалар бермаган.

Эслатиб ўтамиз, кеча, 1 май санасида президент ҳарбий ҳаракатларни давом эттириш учун Конгресс маъқуловини ёки 30 кунлик кечиктириш муддатини олиши керак бўлган 60 кунлик муддат тугаган.

Сенатдаги демократик озчилик етакчиси Чак Шумер Трампнинг баёнотини «сафсата» деб атади: «Бу сафсата. Бу ноқонуний уруш ва республикачилар бунга шерик бўлиб, унинг давом этишига йўл қўяётган ҳар бир кун — ҳаёт хавф остида қолаётган, тартибсизликлар юзага келаётган ва нархлар кўтарилаётган яна бир кундир. Бунинг бадалини америкаликлар тўлашмоқда».