Трамп Эронга қўйилган навбатдаги талаб муддатини яна ортга сурди. Илгари қисқа муддатли ультиматумлар қўйилган бўлса, энди Ҳўрмуз бўғозини тўлиқ очиш учун берилган сўнгги муддат 6 апрелгача узайтирилди. Акс ҳолда, Вашингтон Эроннинг энергетика инфратузилмасига, жумладан электр станцияларига зарба беришини маълум қилмоқда. 

Трамп бу қарорни «музокараларда илгарилаш бор» дея изоҳламоқда. Унинг таъкидлашича, қўшимча вақт «Эрон ҳукумати илтимоси билан» берилган. Бироқ расмий Теҳрон бу каби мулоқотлар мавжудлигини инкор этмоқда ва АҚШни жаҳон бозорларини тинчлантириш учун ахборот ўйини олиб бораётганликда айблаяпти.

Шу билан бирга, бозорлар бу сигналларга жуда сезгир реакция билдирмоқда. Сўнгги баёнот ортидан нефть нархлари кескин кўтарилди, фонд бозорлари эса пасайишни кўрсатди. Бу Ҳўрмуз бўғозининг глобал энергетика тизимидаги ҳал қилувчи ўрнини яна бир бор намоён этди — дунё нефть ташувларининг катта қисми айнан шу йўл орқали ўтади.

Ҳарбий майдонда эса вазият барқарор эмас. Эрон томонидан Исроилга ракеталар учирилиши давом этмоқда, Исроил эса ўз навбатида Эроннинг стратегик объектларига зарбаларни кучайтирмоқда. Хусусан, Теҳронда кучли портлашлар ҳақида хабарлар тарқалди. Бу эса музокаралар фонида ҳам ҳарбий эскалация тўхтамаганини кўрсатади.

Вашингтон ичида ҳам қарашлар бир хил эмас. Трамп Эронни «заифлашган ва музокарага мажбур» деб баҳолаётган бўлса, унинг махсус вакиллари анча эҳтиёткор позицияни билдирмоқда. Уларга кўра, Теҳронни келишувга олиб келиш осон эмас ва босим янада кучайтирилиши мумкин.

Эслатиб ўтамиз, аввалроқ АҚШ президенти Теҳронга 48 соат ичида Ҳўрмуз бўғозини тўлиқ очиш шартини қўйган, Эрон томони эса бунга жавобан агар мамлакат электр тармоқлари нишонга олинса, минтақадаги давлатларга қарши жавоб чоралари кўрилиши мумкинлиги айтди.

Эртаси куни эса Трамп Эрон билан «жуда яхши ва самарали музокара ўтказилгани» ҳақида баёнот билан чиқди ва мамлакат электр тармоқларига зарбалар 5 кунга кечиктирилганини айтди.