АҚШ президенти Доналд Трамп Яқин Шарқ давлатлари билан ўтказилган музокаралардан сўнг Ҳўрмуз бўғози орқали ҳаракатланувчи кемалардан 20 фоизлик йиғим ундириш ташаббусидан воз кечганини маълум қилди. Бу ҳақда у Truth Social ижтимоий тармоғидаги саҳифасида ёзди.

Трампнинг таъкидлашича, ушбу йиғим ўрнига Форс кўрфази давлатлари билан АҚШ ўртасида савдо ва инвестиция битимлари тузилади.

«АҚШ учун мўлжалланган 20 фоизлик компенсация йиғимини Форс кўрфази давлатлари билан тузиладиган савдо ва инвестиция келишувлари билан алмаштиришга қарор қилдим. Бу инвестициялар жуда катта бўлади ва шу билан бирга улар учун ҳам ниҳоятда фойдали бўлади», — деди Трамп.

Унинг сўзларига кўра, Ҳўрмуз бўғози Эрон кемаларидан ташқари барча халқаро кемалар учун очиқ бўлиб қолмоқда.

АҚШ президенти янги ёндашув мамлакатга инвестициялардан катта даромад келтириши ва миллионлаб юқори маошли иш ўринларини яратишини ҳам таъкидлади.

Эслатиб ўтамиз, Трамп 13 июл куни Ҳўрмуз бўғозида Эрон кемаларига нисбатан блокадани тиклашини эълон қилиб, ушбу йўналишни қўриқлаш харажатларини қоплаш мақсадида кемалардан 20 фоизлик йиғим ундиришни таклиф қилганди.

Мазкур ташаббус йирик юк ташиш компаниялари томонидан танқид қилинди. Жумладан, Германия Кема эгалари ассоциацияси (VDR) эса АҚШни халқаро сувлар орқали эркин ҳаракатланиш тамойилига путур етказишда айблаган. Теҳрон ҳам Трамп таклиф қилган йиғимни ҳаддан ташқари юқори деб ҳисоблаган.