АҚШ президенти Доналд Трампнинг сўнгги баёноти Яқин Шарқдаги вазиятнинг қай даражада кескин ва бир вақтнинг ўзида мураккаб дипломатик жараёнлар билан уйғунлашиб кетганини яна бир бор кўрсатмоқда.

Трамп ўз чиқишида Эронда «янги ва нисбатан оқилона режим» билан алоқалар ўрнатилганини таъкидлаб, урушни тугатиш бўйича «сезиларли илгарилаш»га эришилганини билдирди. Бу баёнот расмий дипломатик каналлар орқали эмас, балки сиёсий риторика орқали билдирилган бўлса-да, у Вашингтоннинг можарони назорат остида якунлашга интилаётганидан далолат беради.

Бироқ шу билан бирга, АҚШ раҳбари эҳтимолий келишув амалга ошмаса, Эроннинг стратегик инфратузилмасига қарши кенг кўламли зарбалар берилиши мумкинлигини айтди. 

«Сезиларли тараққиётга эришилди, бироқ агар бирон сабабга кўра яқин орада келишувга эришилмаса (катта эҳтимол билан шундай бўлади ҳам) ва Ҳўрмуз бўғози зудлик билан очилмаса, биз уларнинг барча электр станциялари, нефть қудуқлари ва Харг оролини (ва эҳтимол, барча сув чучуклаштириш иншоотларини ҳам!) портлатиш ва бутунлай вайрон қиламиз. Биз бу объектларга шу пайтгача атайлаб «тегмай» келаётган эдик.

Бу эски режимнинг 47 йиллик «террор ҳукмронлиги» даврида Эрон томонидан қирғин қилинган ва ўлдирилган кўплаб аскарларимиз ҳамда бошқа инсонлар учун қасос бўлади», — деб ёзди Трамп.

Эрон томони эса бу каби баёнотларни босим сифатида қабул қилмоқда ва АҚШ таклифларини «реал эмас» деб баҳоламоқда. Бу эса томонлар ўртасида ҳали ҳам жиддий ишончсизлик давом этаётганини кўрсатади.

Эслатиб ўтамиз, Трамп аввал ҳам Ҳўрмуз бўғозини очиш борасида Эронга муҳлат берган, бироқ кейинчалик ушбу муддатни 6 апрелгача узайтирган эди.