АҚШ президенти Дональд Трамп Владимир Зеленский ва Европа раҳбарлари билан суҳбатда, Владимир Путин билан Аляскада бўлиб ўтадиган учрашувда Украина ҳудудларини «тақсимлаш» масаласини муҳокама қилмаслигини билдирди. CNN ва NBC News’нинг бир нечта манбаларига кўра, Трампнинг асосий мақсади – ўт очишни тўхтатишга эришиш.

Европа раҳбарлари ўт очишни тўхтатиш жараёнини тинчлик музокараларидан олдин амалга ошириш кераклигини таъкидлади. Бироқ NBC News’нинг ёзишича, баъзи Европа етакчилари Трампнинг Путин билан учрашувидан катта натижа кутмаяпти.

6 август куни Путин АҚШ президентининг махсус вакили Стив Уиткофф билан Москвада учрашиб, тинчлик келишуви шартларини баён этган эди. Уларга кўра, Киев Донбассдан воз кечса, ўт очиш тўхтатилиб, фронт чизиғи ҳозирги ҳолатда қолади. Путин шунингдек, Херсон ва Запорожье вилоятларининг Россия эгаллаб турган қисмларидан ҳам воз кечишга тайёр эмаслигини билдирган.

Франция президенти Эммануэль Макроннинг сўзларига кўра, Трамп Украина ҳудудларига оид ҳар қандай муҳокамани фақат Киев иштирокида олиб боришга ваъда берган.