Тошкент халқаро аэропортида 23 январь куни Лондондан учиб келган асли ўзбекистонлик топ-модель Надя Непомнящая қўлга олинди.

У давлат чегарасини ноқонуний кесиб ўтгани учун ушланган ва жиноят иши очилган. 29 ёшли Непомнящая Тошкентга қаллиғи — таниқли кинопродюсер Майкл Грэйси билан паспортида виза варақлари тўлгани сабаб уни хорижий паспортга алмаштириш учун учиб келган.

Унга нисбатан Ўзбекистон Жиноят кодексининг 223-моддаси 1-қисми билан жиноят иши қўзғатилган. Яъни Надя фуқаролик паспортида дунёнинг барча мамлакатларига чиқиш учун рухсатнома ёзуви «стикери»ни расмийлаштирмасдан, қонунга хилоф равишда, белгиланган тартибни бузиб, 2018 йил 9 августда Россия орқали Англияга борган.

Унинг қаллиғи австралиялик Майкл Грейсининг «Буюк шоумен» фильми учта номинация бўйича 2018 йилги «Олтин глобус» мукофотини олган. Ҳозир Надя ва Майкл Тошкентда.

Чиқиш визаси бўлмаган ёки муддати ўтган чиқиш визаси билан юрган ўзбекистонлик фуқаро Жиноят кодексининг 223-моддасига кўра, жиноий жавобгарликка тортилиб, энг кам иш ҳақининг 400 баробаригача жарима ва 3 йилгача қамоқ жазосини олиши мумкин.