Шимолий Корея раҳбари Ким Чен Ин Россияга яна 10 минг аскар жўнатмоқчи. Бу ҳақда Украина президенти Владимир Зеленский разведка маълумотларига таяниб маълум қилди.  

Украина раҳбарига кўра, айни пайтда Шимолий Кореяда Россияга юбориладиган ҳарбий хизматчиларни саралаш жараёни кетмоқда.

Зеленский халқаро ҳамжамиятдан Россиянинг Украинага қарши уруш учун хорижлик аскарларни ёллаш амалиётига чек қўйишда ёрдам сўраган.

Жанубий Корея расмийларига кўра, Шимолий Корея раҳбарияти Россияга 15 мингга яқин аскар йўллаган.

НАТО бош котиби Марк Рютте бу маълумотни тасдиқлаган ва КХДР аскарларининг Россия томонида жанг қилиши нафақат Ҳинд–Тинч океани минтақаси, Евроатлантика макони учун ҳам таҳдид эканини айтган.

Шимолий Кореянинг БМТдаги вакили даставвал мамлакат ўз ҳарбийларини Россияга жўнатаётгани ҳақидаги маълумотларни рад этган эди.

Россия президенти Владимир Путин 2024 йил 24 октябр куни Қозонда бўлиб ўтган БРИКС саммити якуний матбуот анжуманида Шимолий Корея ҳарбийлари Украинага қарши урушда иштирок этиши мумкинлиги ҳақидаги хабарларга изоҳ берар экан, бу масала Москва ва Пхеняннинг иши эканини қайд этган. Шунингдек, у икки давлат ўртасидаги ҳар томонлама стратегик шериклик тўғрисидаги шартноманинг 4-моддасида «Агар томонлардан бири бир ёки бир нечта давлатларнинг қуролли ҳужуми туфайли уруш ҳолатига тушиб қолса, иккинчи томон унга ўз ихтиёридаги барча воситалар билан ҳарбий ёрдам кўрсатади» деган талаб борлигини эслатган.

Шимолий Корея Россияга Украинага қарши урушда қурол-аслаҳа билан ҳам кўмак бериб келмоқда. АҚШ ҳам Шимолий Корея Россияга озиқ-овқат маҳсулотлари эвазига қурол-аслаҳа бераётганини тасдиқлаган.

Пхенян, шунингдек, Корея яриморолида уруш бошлангудек бўлса, Россия мададга келишига умид қилмоқда.