Global smartfonlar bozorida buklanadigan qurilmalar segmenti yangi bosqichga qadam qo‘ymoqda. Texnologik gigant Samsung o‘zining yangi avlod flagmanlarini taqdim etib, raqobatchilariga, xususan, Apple kompaniyasiga jiddiy zarba berdi. Xalqaro ekspertlar tomonidan «buklanadigan iPhone qotili» deb e’tirof etilayotgan uchta yangi model — Galaxy Z Fold 8, Galaxy Z Fold 8 Ultra va Galaxy Z Flip 8 rasman namoyish qilindi.

Yangilangan Galaxy Z Fold 8 modeli ergonomika va quvvat o‘rtasidagi mukammal balansni ifoda etadi. Ishlab chiqaruvchilar bu safar qurilma qalinligini sezilarli darajada kamaytirishga erishgan.

Asosiy ichki ekran 8 dyuymgacha kengaytirildi, bu multimedia mazmunini tomosha qilish va ko‘p vazifali (multitasking) rejimda ishlash imkoniyatini yangi darajaga olib chiqadi. Smartfon yuragini eng so‘nggi Snapdragon 8 Elite protsessori tashkil etadi.

Og‘ir o‘yinlar va murakkab topshiriqlar paytida qurilma qizib ketmasligi uchun muhandislar takomillashtirilgan bug‘ kamerali sovutish tizimini joriy etishgan. Boshlang‘ich versiyasi 1 899 dollardan sotuvga chiqariladi.

Samsung ilk bor Fold turkumida Ultra suffiksiga ega benazir flagmanni taqdim etdi. Bu model eng talabchan foydalanuvchilar va kontent yaratuvchilar uchun mo‘ljallangan. Qurilmaga 200 MPlik asosiy kamera sensori o‘rnatilgan bo‘lib, u tungi tasvirga olish va detallashtirish bo‘yicha buklanadigan smartfonlar orasida mutlaq yetakchiga aylanadi.

Kompaniyaning stilusi — S Pen qo‘llab-quvvatlovi saqlab qolingan. Bundan tashqari, model kengaytirilgan sun’iy intellekt (Galaxy AI) algoritmlari bilan jihozlangan. u matnlar bilan ishlash, ovozni qayta ishlash va foto/videoni professional tahrir qilishda tengsiz yordamchiga aylanadi. Kengaytirilgan tezkor va ichki xotiraga ega ushbu ultra-premium gadjet narxi 2 099 dollardan boshlanadi.

«Raskladushka» formatidagi ixcham  Galaxy Z Flip 8 modeli foydalanuvchilarning eng ko‘p so‘ragan istaklarini hisobga olgan holda qayta ishlandi. Batareya sig‘imi sezilarli darajada oshirildi va yangi tejamkor protsessor bilan ta’minlandi, bu esa kun davomida quvvatlashsiz bemalol foydalanish imkonini beradi.

Smartfon buklangan holatda tashqi ekran orqali yuqori sifatli selfi va videolar olish algoritmlari tubdan yaxshilandi. Ushbu stilli va ixcham qurilmaning narxi 1 199 dollar etib belgilandi.

Nufuzli The Verge, Bloomberg va GSMArena kabi xalqaro texnologik nashrlarning tahlilchilari ta’kidlashicha, Samsungning bir vaqtning o‘zida uchta buklanadigan modelni chiqarishi — Apple tomonidan kutilayotgan ehtimoliy buklanadigan iPhone taqdimoti oldidan bozorni to‘liq egallash strategik qadamidir.

Ayniqsa, Ultra tasnifidagi modelning paydo bo‘lishi biznes va kreativ soha vakillari uchun standart planshet va noutbuklar o‘rnini bosuvchi yagona mobil qurilmaga aylanishga da’vogarlik qilmoqda.