Жорий йилнинг 12 январида Бухоро вилояти Қоракўл туманидаги ўқув марказларидан таҳсил олаётган абитуриентларнинг саломатлиги ёмонлашиб шифохонага ётқизилгани хабар қилинган эди.

Бухоро вилояти соғлиқни сақлаш бошқармаси бошлиғи Элёр Олтиевнинг «Xabar.uz»га маълум қилишича, 11 январь куни соат 07:50 да Қоракўл туманидаги «Илм нури» МЧЖ  биносида юзага келган ҳолатга «Ис газидан заҳарланиш» ташҳиси қўйилган. Жами 37 нафар ўқувчи тез ёрдам хизмати орқали Қоракўл туман тиббиёт бирлашмасига олиб борилган. 

Мурожаат қилганларнинг 20 нафари шифохонага госпитализация қилиниб, қолган 11 нафарига амбулатор тиббий ёрдам кўрсатилган.

Барча беморлар Соғлиқни сақлаш вазирлигининг тегишли стандартлари асосида клиник-лаборатор ҳамда ультратовуш ва рентген каби инструментал текширувлардан ўтказилган.

Вилоятдан жами 10 нафар (токсиколог, реаниматолог) мутахассислар туманга сафарбар этилган. Шунингдек, Республика шошилинч илмий маркази малакали токсикологлари иштирокида ZOOM платформаси орқали консилиум қилинган.

«20 нафар беморнинг барчасидан қонда газ миқдорини аниқлаш мақсадида қон намунаси олинди ва вилоят суд-тиббий экспертизасига тақдим қилинди. 20 нафар бемор аҳволи яхшиланганлиги сабабли  амбулатор тартибда даволанишга юборилиб, ҳудудий оилавий шифокори ва патронаж ҳамшираси бириктирилди», – деди Олтиев.

Таъкидланишича, 12 январь куни ўқув маркази ўқувчилари аҳволини баҳолаш ҳамда яшаш шароитларини ўрганиш мақсадида Қоракўл туман тиббиёт бирлашмасидан 8 нафар , Бухоро вилояти болалар касалхонасидан 11 нафар етакчи мутахассис шифокорлари иштирокида чуқурлаштирилган тиббий кўрик ўтказилган.

Жами 123 нафар ўқувчи чуқурлаштирилган тиббий кўрикдан ўтказилган. Кўрик жараёнида мобил поликлиника, кўчма стационар рентген аппарати, Қон банки, ультратовуш текшируви, электрокардиография ҳамда лаборатория хизматлари йўлга қўйилган.

Тиббий кўрик натижаларига кўра, 9 нафар ўқувчида, жумладан, 4 нафар ўқувчида кўз касалликлари, 2 нафар ўқувчида камқонликнинг енгил даражаси, 1 нафар ўқувчида эндокринологик касалликлар, 1 нафар ўқувчида ЛОР ҳамда 1 нафар ўқувчида кардиологик касалликлар аввалдан мавжудлиги аниқланган.

«Касаллик аниқланган барча ўқувчилар шифокорлар томонидан «Д» диспансер назоратига олинди ва тегишли тиббий тавсиялар берилди. Ўтказилган тиббий кўрик давомида ўткир касалликлар қайд қилинмади», – деди вилоят ССБ бошлиғи Элёр Олтиев.