«Қорадори-2026» тезкор профилактик тадбирининг иккинчи босқичи доирасида Тошкент шаҳрида 3 килограммга яқин гиёҳвандлик воситалари аниқланди. Бу ҳақда Ички ишлар вазирлиги маълум қилди.

Тадбирлар ИИВ Тезкор қидирув департаменти ва унинг ҳудудий бўлинмалари ходимлари томонидан ўтказилган.

Яшнобод туманида 2006 йилда туғилган фуқаронинг ёнидан ва яшаш хонадонидан гашиш, электрон тарози, изоленталар, зип-пакетлар ҳамда магнитлар аниқланган. Тезкор суриштирувлар давомида у интернетдаги наркодўконда «омборчи» сифатида фаолият юритгани ва яширин жойларга жойлаштириб тарқатиш учун унга 200 грамм гашиш берилгани аниқланган.

Шундан сўнг наркодўконнинг бошқа аъзоларини аниқлашга қаратилган тезкор тадбирлар давом эттирилган. Яшнобод туманида 1990 йилда туғилган аёл гиёҳвандлик воситаларини яширин жойга кўмаётган вақтда қўлга олинган. У мазкур жиноий гуруҳда йирик «омборчи» сифатида фаолият юритгани айтилмоқда.

Унинг ён-атрофи кўздан кечирилганда, 146 та изолентали ўрамда жами 146 грамм мефедрон ва MDMA аниқланган.

Шунингдек, унинг ижарага олган дала ҳовлисидан 1 килограмм 127 грамм мефедрон, 700 грамм альфа-PVP, 427 грамм MDMA, 200 грамм кокаин ва 100 грамм гашиш, шунингдек, 1000 та зип-пакет, учта электрон тарози ва изоленталар топилган. Хонадонида унинг жиноий шериги бўлган яна бир аёл ҳам қўлга олинган.

Уюшган жиноий гуруҳнинг қолган аъзоларини қўлга олиш мақсадида Тошкент вилояти Ўртачирчиқ туманида тезкор тадбир давом эттирилди ва ҳудуднинг бир нечта локацияларига қўйилган турли миқдордаги гиёҳвандлик воситаларини наркотик истеъмолчилари олиб кетаётган вақтда қўлга олинди.

Ўтказилган тезкор-қидирув тадбирлари натижасида жами 2 килограмм 700 грамм гиёҳвандлик воситаларининг аҳоли орасида тарқалишининг олди олинган.

Ҳолат юзасидан Жиноят кодексининг 273-моддаси 6-қисми «а» банди билан жиноят иши қўзғатилган.