Ўзбекистонда коррупцияга оид жиноятларнинг аниқ рўйхати қонун даражасида белгилаб қўйилди. ЎРҚ–1155-сонли қонун билан Жиноят кодекси ва бошқа қонун ҳужжатларига қўшимча ҳамда ўзгартишлар киритилди.

Янги тартибга кўра, Жиноят кодексининг қатор моддаларида назарда тутилган жиноятлар расман коррупцияга оид жиноятлар сифатида эътироф этилди. Улар орасида мансаб ваколатини суиистеъмол қилиш, пора олиш ва бериш, воситачилик қилиш, давлат мулкини талон-торож қилишнинг айрим оғирлаштирувчи ҳолатлари ҳам бор.

Шунингдек, Жиноят кодексининг 243-моддасида назарда тутилган жиноят ҳам, агар коррупция жиноятлари натижасида олинган даромадларни легаллаштириш билан боғлиқ бўлса, коррупцияга оид жиноят сифатида баҳоланади.

Қонун билан жазодан муддатидан илгари шартли озод қилиш тартибига ҳам ўзгартиш киритилди. Энди ўзлаштириш ёки растрата қилиш йўли билан талон-торож қилиш, шунингдек фирибгарлик учун ҳукм қилинган ва етказилган зарарни тўлиқ қопламаган шахсларга мазкур енгиллик қўлланилмайди.

Маъмурий жавобгарлик тўғрисидаги кодексга киритилган қўшимчаларга мувофиқ, давлат харидларида бошланғич нарх билан ўртача бозор нархи ўртасидаги рухсат этилган тафовут талабини бузган мансабдор шахсларга БҲМнинг 30 бараваригача жарима солиниши мумкин.

Шу билан бирга, Қорақалпоғистон Республикаси, вилоятлар ва Тошкент шаҳрида коррупцияга қарши курашиш бўйича ҳудудий кенгашлар ташкил этилади. Давлат органлари ва ташкилотларида комплаенс ҳамда коррупцияга қарши ички назорат тузилмалари йўлга қўйилади.

Қонуннинг муҳим янгиликларидан бири коррупцияга оид хавф-хатарлар харитасини шакллантириш тизимининг жорий этилишидир.

Мазкур харита коррупция жиноятлари статистикаси, ҳуқуқни қўллаш амалиёти таҳлили, аҳолининг муносабати, соҳадаги сиёсат самарадорлиги ва ваколатли идоралар ахборотлари асосида шакллантирилади. Уни Коррупцияга қарши курашиш агентлиги юритади.

Қонунга мувофиқ, давлат органида коррупция жинояти ҳақида асосли хабар берган шахсга агентликни олдиндан хабардор қилмасдан икки йил давомида интизомий жазо чораси қўллаш тақиқланади.

Ҳужжат расмий эълон қилинган кундан эътиборан кучга киради.