Британиянинг йирик энергетика компанияси – British Petroleum (BP) Устюрт ҳудудидаги маҳсулот тақсимотига оид битимга қўшилди.  

Мазкур битим Қорақалпоғистон Республикасининг Устюрт минтақасида жойлашган Бойтерак, Теренгқудуқ, Бирқори, Ҳарой, Қорақалпоқ ва Қулбой блокларини қамраб олади.

Тошкент шаҳрида ўтказилган «Ўзбекистон нефт ва гази – 2026» халқаро конференцияси доирасида имзоланган келишувда Энергетика вазири Жўрабек Мирзамаҳмудов, «Ўзбекнефтгаз» АЖ бошқарув раиси Абдуғани Сангинов, SOCAR компанияси президенти (Озарбайжон) Ровшан Нажаф ҳамда BP компаниясининг Озарбайжон, Грузия ва Туркия бўйича минтақавий президенти Джиованни Кристофоли иштирок этди.

Мазкур лойиҳа компаниянинг Ўзбекистондаги илк ташаббуси бўлиб, у «Ўзбекнефтгаз» ва SOCAR билан ҳамкорликда амалга оширилади.

Қайд этилишича, катта ресурс салоҳиятига эга бЎлган ушбу лойиҳа нефт-газ ресурсларини қидириш ва ўзлаштириш ишларини амалга ошириш ва узоқ муддатли манфаатлар яратишга хизмат қилади. Шунингдек, мазкур маҳсулот тақсимотига оид битим (МТБ) BP компаниясининг қидирув портфелини кенгайтириш ва узоқ муддатли ўсиш стратегиясининг муҳим қисми экани айтилди.

Битимдаги томонларнинг улушлари қуйидагича белгиланган:

• BP компанияси – 40 фоиз;
• SOCAR компанияси – 30 фоиз;
• «Ўзбекнефтгаз» АЖ – 30 фоиз.

Маълумот учун, ушбу МТБ дастлаб 2025 йил 24 июл куни Ўзбекистон Республикаси Энергетика вазирлиги, «Ўзбекнефтгаз» ва SOCAR ўртасида имзоланган. Айни пайтда лойиҳа биринчи босқичда бўлиб, SOCAR оператор сифатида сейсмик қидирув ишларини олиб бормоқда.