Миллий статистика қўмитаси маълумотларига кўра, 2026 йилнинг январ-май ойларида Ўзбекистон 11 та хорижий давлатга қиймати 36,5 млн АҚШ долларига тенг бўлган қарийб 16,8 минг тонна гилос экспорт қилди.

Бу кўрсаткич ўтган йилнинг мос даврига нисбатан 4,1 минг тоннага камайган.

Шу билан бирга, ўзбек гилоси ташқи бозорларда талабгирлигини сақлаб қолган бўлиб, экспорт географияси 11 та мамлакатни қамраб олди.

Ҳисобот даврида Ўзбекистондан энг кўп гилос Россияга экспорт қилинди. Бу мамлакатга 11,7 минг тонна маҳсулот етказиб берилган.

Иккинчи ўринда Қирғиз Республикаси бўлиб, ушбу давлатга 2,6 минг тонна гилос экспорт қилинган.

Шунингдек, Қозоғистонга 2 минг тонна, Беларусга 135,3 тонна, БААга 116,7 тонна, бошқа давлатларга эса жами 140 тонна гилос етказиб берилган.

Статистика маълумотлари Россия бозори Ўзбекистон гилоси учун асосий экспорт йўналиши бўлиб қолаётганини кўрсатмоқда. Экспорт қилинган маҳсулотнинг катта қисми айнан ушбу мамлакат ҳиссасига тўғри келган.