Жорий йилнинг 7-8 феврал кунлари Марказий Осиё атроф-муҳит ва иқлим ўзгаришини ўрганиш университети (Green University)да Экология, атроф-муҳитни муҳофаза қилиш ва иқлим ўзгариши вазирлиги ҳузуридаги Давлат экологик экспертизаси маркази томонидан «Давлат экологик экспертизаси фаолиятидаги ислоҳотлар: муаммо ва ечимлар» мавзусида ўқув-семинар ташкил этилди.

Тадбирнинг мақсади ва аҳамияти: тадбирда Экология, атроф муҳити муҳофаза қилиш ва иқлим ўзгариши вазирлиги, Олий суд, Бош прокуратура, Қурилиш ва уй-жой коммунал хўжалиги вазирлиги, Марказий банк вакиллари, Давлат экологик экспертизаси маркази ходимлари, эколог-экспертлари ва унинг ҳудудий филиаллари раҳбарлари ҳамда ННТ ва ОАВ вакиллари иштирок этди.

Тадбирда муҳокама қилинган масалалар: сўнгги йилларда мамлакатимиз иқтисодиётида амалга оширилаётган кенг кўламли ислоҳотлар, модернизация, таркибий ўзгариш ва диверсификация жараёнлари, шунингдек, саноат корхоналари атроф-муҳит ҳолатига сезиларли даражада таъсир этмоқда. Боз устига, саноат ривожланиши даврининг иқлим ўзгаришлари кучайиши даври билан бир вақтда содир бўлиши экологик муаммоларни янада ривожланишига сабаб бўлмоқда.

Экологик экспертиза фаолияти ушбу жараёнларда атроф-муҳитни ҳимоя қилишнинг энг устувор ва мақбул тадбири ҳисобланиб, фаолият самарадорлиги соҳанинг ҳуқуқий таъминотига узвий боғлиқдир.

Қабул қилинган қарорлар ва амалга ошириладиган чоралар: семинарда давлат экологик экспертизаси хулосасини тайёрлаш, экологик экспертиза хулосасини олмаган корхоналарнинг ҳуқуқий жавобгарлиги, архитектура лойиҳаларини ишлаб чиқишда давлат экологик экспертиза хулосасини талаб қилиш, лойиҳаларнинг экологик хулосаси бўлмасдан молиялаштирилиши тўғрисидаги масалалар Олий суд, Бош прокуратура, Марказий банк ва Қурилиш вазирликлари ҳамкорлигида муҳокама этилди.

Экологик экспертиза қонунчилиги ва ҳуқуқий ислоҳотлар: Экологик экспертиза фаолиятидаги асосий қонунчилик ҳужжати – «Экологик экспертиза тўғрисида»ги Қонун қабул қилинганига чорак аср бўлган. Бугунги кундаги глобализация жараёнлари ва экологик муаммоларга жавоб бериш учун, Қонуннинг янги таҳрирдаги лойиҳаси ишлаб чиқилди ва «Экологик экспертиза, атроф-муҳитга таъсирни баҳолаш ва стратегик экологик баҳолаш тўғрисида»ги янги Қонун қабул қилинди.

Тадбир якуни бўйича мавжуд муаммо ва камчиликларни ҳамкорликда ҳал этишга йўналтирилган қўшма қарор лойиҳаси қабул қилинди.

Икки кунлик тадбир якунида Марказий Осиё атроф-муҳит ва иқлим ўзгаришини ўрганиш университети (Green University) ҳудудида «Яшил макон» умуммиллий лойиҳаси доирасида Давлат экологик экспертизаси марказининг «экологик боғи» ташкил этилди, унда тадбир иштирокчилари томонидан 500 туп манзарали дарахт кўчатлари экилди.