Андижон вилоятининг Хўжаобод тумани маҳаллий кенгашининг бир гуруҳ депутатлари туман ҳокими Отабек Расулов фаолиятидан норози бўлиб, мамлакат Президенти ва бошқа республика раҳбарлик идораларига шикоят ёзгани айтилмоқда.

Aризада ҳокимнинг гўёки давлат мулкини талон-торож қилиш, ер сотиш, бюджет маблағларини ноўрин сарфлаш, кадрлар сиёсатидаги шошқалоқлик, тадбиркорларни қўллаб-қувватлаш ўрнига уларнинг ривожланишига тўсқинлик қилаётганидан ташқари маънавий-ахлоқий томондан «тескари ўрнак» бўлаётгани ҳам қайд этилади. Шунингдек, 2019 йилда Олий Мажлис Қонунчилик Палатаси ва маҳаллий Кенгашларга сайлов жараёнида Отабек Расулов сиёсий партияларга тазйиқ ўтказиб, ОAВда номзодлар рўйхати чиқишига бир кун қолганда ўзига қарашли ўнлаб номзодларни ўзбошимчалик билан алмаштиргани ҳам таъкидланади.

Депутатлар туман ҳокимининг ишини алоҳида ўрганиш мақсадида махсус ишчи гуруҳ тузилиб, унга ўзлари ҳам жалб этилишини сўрашган.

Эслатиб ўтамиз, ўтган ҳафта Андижон вилояти ҳокими Шуҳрат Абдураҳмонов ўн тўққизга тўлган қизининг туғилган кунини карантин қоидалари ва раҳбар маънавиятига зид тарзда ўта дабдаба билан нишонлангани ортидан жиддий танқидларга учраганди. Айни танқидларга ҳамон муносабат билдирилгани йўқ.