Поп ихтисослаштирилган давлат ўрмон хўжалиги мансабдорларининг қатор жиноий қилмишлари фош этилди.

Мансабдорларнинг эътиборсизлиги туфайли, хўжалик ер майдонларидан ижара асосида фойдаланувчи 5 нафар тадбиркор бошқа ерларни ҳам ўзбошимчалик билан эгаллаб, бино ва иншоотлар қурган. Ер майдонларининг ихтисослашуви ўзгартирилиши оқибатида давлат манфаатларига жиддий зарар етказилган. 460 нафар ижарачидан 1 млрд 480 млн сўм ижара пули ундирилмагани ҳам ишга соввуққонлик оқибати.

Қолаверса, ўрмон хўжалиги мансабдорлари айрим ижарачилар билан тил бириктириб, 2023-2025 йиллар давомида жами 5356 метр/куб норуда материалларни ноқонуний қазиб олиб, давлатга 1 млрд 322 млн сўмлик зарар етказишган.

Ушбу ҳолатлар бўйича ўрмон хўжалиги мансабдор шахслари ва бошқаларга нисбатан ЖК 193, 196-1, 207 ва 229-моддалари билан жиноят иши қўзғатилиб, тергов ҳаракатлари олиб бориляпти.

Яна бир ҳолатда ўрмон хўжалигининг бўлим ўрмонбегиси муқаддам хўжалик балансида бўлган ва кейинчалик туман ҳокимлиги захирасига қайтарилган ерлардан 20 сотих қисмини танишлари орқали Чуст туманида яшовчи фуқарога тураржой сифатида расмийлаштириб бериш эвазига 15 минг АҚШ доллари олган вақтида ашёвий далиллар билан ушланган. Тезкор тадбир давомида ушбу пул маблағидан 500 АҚШ долларини олган вақтида Давлат кадастрлар палатасининг Поп туман филиали мутахассиси ҳам қўлга тушди.

Мазкур шахсларга нисбатан ЖК 168-моддаси билан жиноят иши қўзғатилиб, тергов ҳаракатлари олиб борилмоқда.

Энг ачинарлиси, ўрмон хўжалигининг раҳбари ҳам ноқонуний ишлардан четда қолмаган. Поп ихтисослаштирилган давлат ўрмон хўжалиги директори вазифасини вақтинча бажарувчи бу шахс ер участкаларини электрон онлайн-аукцион орқали ижарага бериш тартибини бузган ҳолда, маҳаллий тадбиркорга хўжалик балансидаги 50 сотих ер майдонини шартнома асосида ижарага бериш эвазига 10 минг АҚШ доллари талаб қилиб, олдиндан 5 минг АҚШ доллари олган вақтида ашёвий далиллар билан ушланган.

Унга нисбатан ЖК 168-моддаси 3-қисми “в” банди билан жиноят иши қўзғатилиб, тергов ҳаракатлари олиб борилмоқда.

Хабарга кўра, ушбу мансабдор муқаддам ҳам бир неча бор судланган.