Президент Шавкат Мирзиёевга аҳолини ва қишлоқ хўжалигини рўйхатга олиш тадбирларини ташкил этиш ҳамда ўтказиш бўйича амалга оширилаётган ишлар юзасидан ахборот берилди.

Ушбу тадбир мамлакатимизда демографик жараёнлар, меҳнат ресурслари, ижтимоий инфратузилма ва ҳудудий ривожланишни илмий асосда режалаштиришда муҳим аҳамият касб этади. Рўйхатга олиш жараёнлари халқаро стандартлар асосида, замонавий рақамли ечимлардан фойдаланган ҳолда амалга оширилмоқда.

Рўйхатга олиш жорий йилнинг 15 январидан 28 февралигача икки босқичда ўтказилмоқда. 15-31 январь кунлари давом этадиган биринчи босқичда фуқаролар махсус ахборот тизими орқали онлайн рўйхатдан ўтишлари мумкин. Иккинчи босқичда эса 4-28 февраль кунлари “маҳалла еттилиги” ходимлари томонидан уйма-уй юриб, саволномалар планшет қурилмалари орқали тўлдирилади.

Аҳолини рўйхатга олиш жараёнлари census.stat.uz порталида амалга оширилиб, OneID тизими орқали идентификация қилиниши белгиланган. Барча маълумотлар геоахборот тизими асосида мониторинг қилинмоқда. Шу мақсадда республика бўйича 7,6 миллиондан ортиқ хонадон ва турар жойларнинг геоманзиллари шакллантирилди, жараёнларни реал вақт режимида кузатиб бориш имконини берувчи махсус мониторинг дашбордлари ишлаб чиқилди.

Фуқаролар томонидан тақдим этиладиган барча маълумотлар қонунчилик талабларига мувофиқ ҳимоя қилинади, шахсий маълумотлар махфий сақланади ва фақат статистик мақсадларда қўлланилади.

Рўйхатга олиш тадбирларини юқори савияда ўтказиш учун 14 та ҳудудий ва 208 та туман ва шаҳар штаблари ташкил этилди. 60 минг нафарга яқин рўйхатга олувчи ходимлар тайёрланди. Жумладан, 54 минг нафар “маҳалла еттилиги” вакиллари, 2,6 минг захира ходимлар ҳамда 4 минг нафар ҳудудий штаб аъзолари жараёнга жалб этилди. Шунингдек, вазирлик ва идоралардан 480 нафар тренер, олий таълим муассасаларидан 3200 нафар волонтёр ўқувдан ўтказилди.

Аҳолини хабардор қилиш ва тарғибот ишларига ҳам алоҳида эътибор қаратилмоқда. Жумладан, 110 та тарғибот видеоролиги, 600 та телевизион лавҳа тайёрланди, ижтимоий тармоқда 6,3 мингта, аҳоли гавжум жойлар ва жамоат транспортларида 23 мингдан зиёд ахборот материаллари жойлаштирилди.

Қайд этилганидек, бугунги кунга қадар махсус портал орқали 2,48 миллион хонадон ҳамда 31 мингта фермер хўжаликлари ва қишлоқ хўжалиги корхоналари рўйхатга олинди.

Давлатимиз раҳбари аҳоли ва қишлоқ хўжалигини рўйхатга олиш тадбирларини сифатли ўтказиш, маълумотларнинг ишончлилигини таъминлаш ва улардан қарор қабул қилиш жараёнларида кенг фойдаланиш муҳимлигини таъкидлади.