Шакар истеъмоли тананинг тўлиқ дам олиш қобилиятини пасайтириши маълум қилинди. 

Дам олишдан олдин таркибида шакар бўлган маҳсулот ва ширинликлар истеъмол қилиш тананинг стрессга дош бериш ва тўлиқ дам олиш қобилиятини пасайтириши мумкин. Бу ҳақда Халқаро психофизиология журналида (IJP) чоп этилган тадқиқотчилар томонидан чиқарилган хулосада айтилади. 

94 нафар катта ёшлилар иштирок этган тажрибада бир гуруҳ кўнгиллилар таркибида глюкоза бор ичимликни ичишди, иккинчи гуруҳ эса сув ичди. Кейин иштирокчилар дам олишди. Барча иштирокчилар субъектив хотиржамлик ҳисси ҳақида хабар беришган бўлса-да, физиологик кўрсаткичлар мураккаброқ манзарани очиб берди. 

Дам олиш техникаси тикланиш учун масъул бўлган парасемпатик асаб тизимини фаоллаштирди. Бироқ, бир вақтнинг ўзида шакар истеъмол қилган иштирокчилар симпатик асаб тизимининг - стресс ва тана ресурсларини сафарбар қилиш учун масъул бўлган тизимнинг фаоллигини оширдилар. Натижада, тана юқори қўзғалиш ҳолатида қолди.  

Муаллифларнинг фикрига кўра, бу шакар тананинг дам олиш режимига тўлиқ ўтиш қобилиятига халақит бериши ва медитация ёки массаж каби амалиётларнинг самарадорлигини пасайтириши мумкинлигини англатади. Бошқача қилиб айтганда, одам ўзини бўшашган ҳис қилиши мумкин, аммо танаси стресс остида бўлгандек жавоб беришда давом этади. 

Тадқиқотчиларнинг таъкидлашича, самаралироқ тикланиш ва асаб тизимига тушадиган юкни камайтириш учун дам олишдан олдин шакарга бой овқатлардан тийилиш яхшироқдир.