Ўзбекистон Республикаси Бош прокуратураси бошқарма бошлиғи, адлия катта маслаҳатчиси Содиқжон Бердиалиев АОКА ҳузурида ташкил этилган штабда бўлиб ўтган брифингда каратин қоидаларига амал қилмаганларга нисбатан қонун ва ўрнатилган тартибнинг энг оғир жазоси қўлланилишини алоҳида таъкидлаб ўтди.

«Ҳозирги вазиятда ҳеч кимга кечиримлилик қилинмайди. Балки, ким бўлишидан қатъий назар ҳуқуқбузарлик ёки жиноят содир қилса унга албатта қонун ва ўрнатилган тартибнинг энг оғир жазоси қўлланилади», деди у.

С.Бердиалиевга кўра, жорий йилнинг 15 апрель ҳолатига карантин қоидаларига амал қилмаслик бўйича 63.882 та ҳуқуқбузарликлар аниқланди. Ҳуқуқбузарларнинг 58.901 нафари эркаклар, 4.981 нафари  аёллардир.

Ҳуқуқбузарларнинг 60.628 нафари «тиббий ниқоб тақмасдан юриш», 401 нафари «карантин ҳудудини ташлаб кетиш», 220 нафари «вақтинчалик тўхтатилган савдо фаолиятини давом эттириш», 29 нафари «маросим ёки йиғинлар ўтказиш», 10 нафари «ижтимоий тармоқларда ваҳима чиқарувчи ёки асоссиз маълумотлар тарқатиш» ва 2594 нафари бошқа ҳуқуқбузарликларни  содир  этишган.

Карантин эълон қилинган кундан бошлаб 20 нафар фуқароларимиз белгиланган тартибни қўпол равишда бузганлиги учун жиноят ишлари қўзғатилиб, уларнинг  аксарияти қамоққа  олинган.