Аввалроқ жорий йил 10 февраль имзоланган Президентнинг тадбиркорлик фаолиятини амалга ошириш учун қулай шарт шароитларни яратишни назарда тутувчи ПФ-21-сон Фармони 7-бандида 2023 йил 1 майдан бошлаб жисмоний шахслар ўртасида пул ўтказмаларини амалга оширувчи ташкилотлар кўрсатилган хизматлар учун комиссия олинишидан қатъий назар электрон ҳисобварақ-фактурани расмийлаштиришлари ва тақдим этишлари белгилангани ҳақида хабар берилган эди.

Мазкур тартиб ижтимоий фаоллар ўртасида муҳокама мавзуси бўлиб келмоқда. Иқтисодиёт ва молия вазирлиги муаллифлигида ишлаб чиқилган фармоннинг 7-банди 4-хатобошиси қонунчиликка зид келишидан тортиб, унинг ҳужжат лойиҳасида бўлмаганигача айни вақтга қадар турли нашрларда танқид остига олиб келиняпти. 

Иқтисодчи Отабек Бакиров бу тартибнинг жорий йил 1 май кунидан кучга кирган янгиланган Конституцияга ҳам мутлақо зидлиги ва ноқонуний эканлигини ёзяпти.

«Бош қомуснинг 15-моддасига кўра, Ўзбекистон Республикаси Конституцияси олий юридик кучга эга бўлиб, тўғридан-тўғри амал қилади. Яъни ҳеч бир ҳужжат, у низомми, фармонми, қарорми ё қонунми Конституцияга зид бўлиши мумкин эмас. Агар зид бўлса, Янги Конституция уни автоматик тарзда бекор қилади», – дея эслатади Бакиров.

Конституциянинг 41-моддасида эса «Банк операцияларининг, омонатларнинг ва ҳисобварақларнинг сир тутилиши, шунингдек, мерос ҳуқуқи қонун билан кафолатланади», деб ёзиб қўйилган.

Иқтисодчининг таъкидлашича, юқоридагиларга кўра 3 ойдан буён муҳокамалар мавзуси бўлиб келаётган, лойиҳада бўлмасдан, ҳужжатнинг имзолатиш учун Президентга киритилаётган пайтда қўшиб юборилган банк сирини ташкил этувчи P2P ўтказмалар ҳақидаги маълумотлар солиқ органларида жамланишинини кўзда тутадиган ПФ-21 Фармоннинг 7-банди 4-хатбошиси Конституцияга зид ва ноқонуний.

«Банклар банк сирини ташкил этувчи P2P ўтказмалар ҳақидаги маълумотларни солиқ органларига тақдим этишни зудлик билан тўхтатиши, солиқ органлари P2P ўтказмалар ҳақидаги маълумотларни электрон ҳисобварақ-фактура ёки бошқа каналлар воситасида олишдан воз кечишлари зарур!» – дейди Отабек Бакиров.

У, шунингдек, барчани Янги Конституцияга амал қилишга чақиради ва «амал қилмасак, нега Конституцияни янгиладик?» деган саволни ўртага ташлайди.