Бугунги кунда Янги Ўзбекистон нафақат иқтисодий ривожланиш, балки маънавий уйғониш даврини бошидан кечирмоқда. Давлатимиз раҳбари томонидан имзоланган навбатдаги тарихий Фармон мамлакат маданий ҳаётида чинакам шов-шувли воқеага айланди. Санъат, адабиёт ва маданият фидойилари – юртимизнинг ҳақиқий маданият элчилари юксак давлат мукофотлари билан тақдирландилар.

Бу шунчаки тақдирлаш маросими эмас, бу — халқимиз маънавиятини юксалтириш, миллий қадриятларимизни асраб-авайлаш ва маданий меросимизни келгуси авлодларга безавол етказиш йўлида кечаю кундуз фидокорлик кўрсатаётган ижодкорларга билдирилган юксак ишонч ва халқ эътирофидир!

Фармонга мувофиқ, 167 нафар соҳа вакили давлатимизнинг фахрий унвонлари, орден ва медалларига сазовор бўлди. Улар орасида:

Ўзбекистон халқ артисти, халқ бахшиси, халқ рассоми, халқ устаси ва халқ шоири каби унвонлар эгалари;

“Ўзбекистонда хизмат кўрсатган ёшлар мураббийи”, “Хизмат кўрсатган маданият ходими” каби нуфузли унвон соҳиблари;

“Фидокорона хизматлари учун”, “Меҳнат шуҳрати”, “Дўстлик” орденлари ҳамда “Келажак бунёдкори” каби кўкрак нишонлари билан тақдирланганлар бор.

Бу йилги Фармоннинг яна бир эътиборга молик ва таъсирли жиҳати 24 нафар марҳум ижодкорларнинг ҳам давлат мукофотлари билан тақдирлангани бўлди. Ўзбек санъати ва адабиёти ривожига беқиёс ҳисса қўшган, аммо бугун орамизда бўлмаган буюк санъаткорларнинг хотирасига кўрсатилган бундай эҳтиром, уларнинг номи ва мероси халқимиз қалбида доимо барҳаёт эканини яна бир бор исботлади.

Янги Ўзбекистонда ижод аҳлига қаратилаётган бундай эътибор — мамлакатимизда инсон қадри нақадар улуғланаётганининг яққол далилидир. Бугунги ислоҳотлар фақатгина бинолар қуриш эмас, балки миллий санъатимизни халқаро майдонда муносиб тарғиб этиш, ижодкорларга кенг имкониятлар эшигини очишга қаратилган.

Мукофотланганларнинг ҳар бири ёш авлод учун ҳақиқий ибрат мактаби, десак муболаға бўлмайди. Уларнинг меҳнати, ватанга муҳаббати ва санъатга бўлган садоқати келажак авлодни ҳам катта марралар сари руҳлантиради.

Маданият ва санъат миллатнинг юзи, тарихи ва келажагидир. Давлат томонидан кўрсатилган бу юксак эътибор ижод аҳлига янада куч-ғайрат бағишлаши, ўзбек маданиятини янги, янада юксак поғоналарга олиб чиқиши шубҳасиз.