Бишкек ҳокими бозорга машиналарни бепул киритишни буюрди
Бишкек шаҳри ҳокими Айбек Жунушалиев бозорга автомобилларнинг кириши учун олинаётган тўловни бекор қилдирди.
Кеча, 12 август куни «Кудайберген» бозорини текширишга борган ҳоким киришда ҳайдовчилардан пул олинаётганини кўриб, жаҳли чиққан. Маълум бўлишича, бозорга киришда енгил машиналардан 25 сомдан, юк машиналаридан 40 сомдан ундириб келинган (1 қирғиз соми — 143,53 сўм).
«Нимага асосланиб бозорга кириш учун пул оляпсизлар? Бу пуллар қаерга ва қанча миқдорда бориб тушяпти?», — деб сўради ҳоким бозор ходимларидан.
Уларнинг айтишича, автомобиллардан кунлик тушум 15 мингдан 20 минг сомгача ва бу пуллар бозор маъмуриятига бориб тушяпти.
Текширувдан сўнг, ҳоким бозорга киришда ҳайдовчилардан пул ундиришни бекор қилишни буюрди.
Изоҳ қолдириш учун сайтда рўйхатдан ўтинг
Кириш
Ижтимоий тармоқлар орқали киринг
FacebookTwitter