Ўзбекистон ва Покистон ҳамкорлигида Заҳириддин Муҳаммад Бобур ҳақида қўшма фильм суратга олиш режалаштирилмоқда. Бу ҳақда Покистон Ахборот ва телерадиоэшиттириш вазирлиги Ташқи тарғибот қанотининг Марказий Осиё республикалари бўйича директори Асиф ур Раҳмон Хон Xabar.uz мухбири билан суҳбатда маълум қилди.

Унинг сўзларига кўра, лойиҳа ҳозирча ишлаб чиқиш босқичида. Айни пайтда сценарий кўриб чиқиляпти, суратга олиш майдончалари ва манзиллар эса ҳали якуний тасдиқланмаган.

«Лойиҳа қўшма иш бўлишига умид қиламан. Покистон ҳудудида ҳам суратга олиш ишлари бўлиши мумкин. Аммо бу масалалар ҳали ҳал қилиниши керак», – деди Асиф ур Раҳмон Хон.

Филмда қайси мамлакат актёрлари иштирок этиши ҳозирча аниқ эмас. Бу борадаги тафсилотлар Покистоннинг Электрон медиа ва нашрлар дирекцияси ҳамда Ўзбекистон Кинематография агентлиги томонидан келишилмоқда.

«Актёрлар таркиби тўлиқ ўзбекистонликлардан, покистонликлардан ёки ҳар икки мамлакат вакилларидан иборат бўладими, деган савол қизиқиш уйғотаётганини тушунаман. Менимча, фильмда икки мамлакат актёрлари иштирок этади. Бу Покистон ва Ўзбекистон ўртасидаги қўшма ҳамкорлик руҳига мос бўлади», – деди у.