«Reuters» маълумотига кўра, Эрон АҚШнинг вақтинчалик санкциялардан озод қилиш қарори ортидан Япония компаниялари билан нефт етказиб беришни қайта йўлга қўйиш бўйича дастлабки музокараларни бошлаган.

Манбаларнинг билдиришича, АҚШ 22 июн куни Эронга нисбатан 60 кунлик тинчлик музокаралари доирасида санкциядан вақтинчалик озод қилиш рухсатини берган. Ушбу рухсат 21 августгача амал қилади.

Икки эронлик манбага кўра, Япониянинг учта компанияси 2019 йилдан бери биринчи марта Эрон нефтини харид қилиш имкониятини ўрганмоқда. Ғарбдаги соҳавий манба ҳам Япония ва Эрон расмийлари ўртасида дастлабки музокаралар кечаётганини тасдиқлаган.

Япония Иқтисодиёт, савдо ва саноат вазирлиги расмийларидан бири бундай музокаралар ҳақида маълумоти йўқлигини айтган. АҚШ Молия вазирлиги ва Япония Ташқи ишлар вазирлиги эса ҳозирча изоҳ бермаган.

Манбаларга кўра, эҳтимолий битим амалга ошиши учун АҚШ санкциялардан озод қилиш муддатини узайтириши талаб этилади. Чунки Эрондан Японияга нефт ташиш вақти мавжуд рухсат муддатидан узоқроқ давом этади.

Эрон томони нефт Харк оролидан юкланиши ва япон операторлари бошқарадиган танкерлар орқали ташилишини режалаштирмоқда. Шу билан бирга, суғурта ва денгиз хавфсизлиги асосий муаммолардан бири бўлиб қолмоқда.

Эрон Миллий нефт компанияси анъанавий харидорлар, жумладан Японияга мурожаат қилиб, тинчлик келишуви имзоланиб, санкциялар бекор қилинса, нефт харидини қайта тиклашни таклиф қилган.

Бироқ Ормуз бўғозидаги хавфсизлик вазияти ҳануз ноаниқлигича қолмоқда. Яқинда ушбу ҳудудда контейнер ташувчи кемага ҳужум қилинган, Эрон Ислом инқилоби қўриқчилари корпуси эса бўғоз орқали ўтувчи кемалар аввалдан келишилиши лозимлигини билдирган.

БМТнинг денгиз транспорти агентлиги баҳосига кўра, бўғознинг марказий қисмида тахминан 80 та сув ости минаси мавжуд. Таҳлилчилар фикрича, вақтинчалик санкция имтиёзи Осиёдаги йирик нефт қайта ишловчиларини фаол харидга ундамайди ва асосий харидорлар сифатида Хитойнинг мустақил нефт қайта ишлаш заводлари қолиши мумкин.