Жанубий Корея ҳукумати Украинага қурол етказиб беришни тақиқловчи сиёсатини қайта кўриб чиқиш ниятида эканлигини маълум қилди.

Сеул бу қадамларни Россия президенти Владимир Путин Шимолий Кореяга ташрифи чоғида бу давлат раҳбари Ким Чен Ин билан ҳамкорликни, жумладан, ҳарбий ҳамкорликни кенгайтириш бўйича келишув имзолаганидан сўнг амалга оширмоқда.

Жанубий Корея миллий хавфсизлик агентлиги раҳбари Жан Хо Жин Украинага қурол етказиб бериш масаласи кўриб чиқилишини маълум қилди, деб хабар бермоқда Yonhap агентлиги.

Жан Хо Жин, шунингдек, Сеул Россиянинг КХДР билан имзолаган стратегик шериклик шартномасини қоралашини айтди.

Унинг қўшимча қилишича, Москва ва Пхенян ўртасидаги Шимолий Корея ҳарбий салоҳиятини кучайтирадиган ҳар қандай ҳамкорлик БМТ санкцияларини бузади.

Расмийнинг таъкидлашича, Жанубий Корея ҳам Россияга қарши қўшимча санкциялар киритади, бу тўрт суд, беш ташкилот ва саккиз кишига таъсир қилади.

Жанубий Корея расмийлари, қоида тариқасида, урушаётган мамлакатларга қурол етказиб беришмайди, бироқ уруш бошланганидан сўнг, Украина учун истисно қилишга чақириқлар тобора кўпайиб бормоқда.

Украинадаги уруш пайтида Жанубий Корея, оммавий ахборот воситаларига кўра, АҚШга ярим миллион 155 мм ўқ-дориларни ижарага берган.